Aban, Prezidente Repúblika Anúnsia Solusaun ba Inserteza Polítika

0
478
Enkontru membru Konsellu Estadu sira ne'ebé hala'o iha Palásiu Prezidente, kuarta, (24/1). Foto António Gonvalves

DILI, (TATOLI) – Prezidente Repúblika, Francisco Guterres Lú Olo, ofisialmente sei anúnsiu desizaun hodi solusiona inserteja polítika iha rai laran.

Tuir informasaun ne’ebé jornalista Tatoli asesu hosi Gabinete Prezidente Repúblika iha Palásiu Prezidente Nicolau Lobato, Bairru Pité, dader ne’e haktuir Prezidente Repúblika sei anúnsiu asuntu ne’e iha sesta (26/1) tuku 10.00 iha salaun enkontru Palásiu Prezidente Nicolau Lobato no sei akompaña hosi Xefe Kaza Sivíl, Militár Prezidénsia Repúblika.

Prezidente Repúblika iha direitu prerogativu tuir Konstituisaun haruka atu fó sai desizaun saida de’it ne’ebé tuir Prezidente hanoin katak bele solusiona problema rai laran, hafoin konsulta ho reprezentante partidu polítiku sira ne’ebé hetan asentu iha Parlamentu Nasionál nomós membru Konsellu Estadu sira.

Tuir konvite ne’ebé Tatoli asesu hosi Palásiu Prezidente Republika katak kada mídia imprensa, rádiu no online sei reprezenta hosi jornalista na’in ida no televizaun na’in rua hodi halo kobertura ba aventu ne’e.

Alende ne’e, Xefe Estadu mós sei konvida eis titulares nomós korpu diplomátiku sira hodi hola parte.

Jornalista: Xisto Freitas

Editora: Rita Almeida

HUSIK IDA HATÁN