AA Hahú Fasilita Ona Kartaun Identidade ba Ajénsia Sira

0
108
Foto/Google.

DILI, (TATOLI) – Autoridade Aduaneira (AA) fasilita ona kartaun identidade (ID Card) ba broka ka ajénsia iha Timor-Leste hamutuk 29 ho ema ne’ebé hala’o serbisu pur volta 100 resin, nune’e ho fasil halo kontrola iha servisu.

Diretór Jerál AA, José António Fátima Abílio, hatete semana kotuk AA entrega ona ID card ba broka sira atu tau sira iha dixiplina tanba, la’e ema ida mai hatete nia mós broka. Bainhira ema ne’e laiha ID card signifika nia latama iha rejistu no ajénsia la rekoñese tanba latama iha lista ajénsia nian.

“Iha tinan kotuk ami ofisializa no fó tiha ona sertifikadu ba sira, tuir formasaun hotu ona no iha faze ikus mak fó ID card, bainhira sira mai prosesa dokumentu kona-ba importasaun no esportasaun uza ID card, se sira lalori automátikamente ami sei la fó atendimentu tanba ne’e ami konsidera sira ne’e broker ilegál latama iha ami-nia lista”, katak José iha edifísiu tuan Ministériu Finansa, ohin.

Hafoin fó tiha ID card, AA rekomenda ba ajénsia ida-idak esforsa-aan para membru sira uza uniforme tuir ajénsia nia eskolla para bele identifika sira.

“Tanba Alfándega rasik hanesan instiutisaun Estadu ho uniforme, sira mós mai tenke uniforme para ita bele kontrola malu ho di’ak liután”.

José hatutan ba broka sira ne’ebé hetan kartaun mak bele halo prosesu dokumentu no dezalfandegamentu ba merkadoria sira.

“Iha tinan kotuk ami husi Alfándega deteta katak iha balun ne’ebé lakohi halo serbisu, buka fali ema seluk mai halo serbisu depois nia simu de’it persentajen husi prestasaun serbisu ne’ebé ema ida halo. Buat sira ne’e hotu mak ami tenta aplika ona kritéria sira ne’e para bele tau sira tuir regra no dixiplina. Ho ID card ne’e fasil ona atu halo kontrola ba sira ne’ebé mak la’ós broker”.

Kartaun ofisiál ne’ebé AA fó ba broka sira ne’e sei revona hafoin tinan rua halo avaliasaun ba sira no iha tempu ne’e mak troka ID card foun.

Sobre ajénsia ka broka iha Timor-Leste hamutuk 29 mak Naroman Agency ho nian broka ualu, Sharalia ho nia broka na’in-hitu, De Samoro II iha broka ualu, SDV, sia, Pacific Agency, hitu, Tilman Bro’s, sanulu, Lima Ekspedisi, lima, Maritime Services, sia, Everise Warehoushing & Transport, ualu, Bethoven Line, haat, D & N Movers, ualu, Crocodile Agency, ualu, Vertude Unip. Lda, neen, Ariana Ocenao Agency Unip. Lda, lima, Corrotrans Unip, Lda, neen, Fatul Agency, Lda, neen, Builare Agency, neen, Alanea Agency, sia, JVK-Naga Movers, lima, Timor Bonuk, Haat, Starking, neen, Cooperativa Café Timor, rua, Lita Store, neen, East Timor Trading, neen, PT-Pertamina, haat, Vitoria, Lda, rua, Kmanek Supermarket, tolu, DHL, tolu no Holiwono iha broka ida.

Jornalista: Maria Auxiliadora

Editora: Rita Almeida

HUSIK IDA HATÁN