DILI, (TATOLI) – Tuir líder hosi partidu Frente Revolusionária Timor-Leste Independente (FRETILIN) katak solusaun ba impase polítika iha rai laran mak eleisaun antesipada.
“Ba FRETILIN, tenke fó fila ba povu atu deside”, hatete Sekretáriu Jerál partidu FRETILIN, Marí Alkatiri, ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin sorumutu ho Prezidente Repúblika, Francisco Guterres Lú Olo.
Akompaña hosi adjuntu sekretáriu jerál sira no xefe bankada iha Parlamentu Nasionál enkontru ho Prezidente Repúblika hodi buka solusaun situasaun polítika ne’ebé akontese dadaun.
Enkontru ne’e, líder FRETILIN mantein opsaun nu’udar solusaun justu hodi solusiona inpase polítika ne’ebé la’o durante fulan neen.
Tuir Marí Alkatiri sé maka soberanu foti desizaun ikus maka povu no Prezidente Repúblika tuir konstituisaun bele loke dalan ka bele la loke.
Biban ne’e, Prezidente Repúblika la hateten ba FRETILIN solusaun saida maka Prezidente atu foti maibé somente hakarak rona partidu sira nia opiniaun.
“Desizaun Prezidente nian ita tenke respeita”, Marí haktuir hodi hatutan katak FRETILIN la konkorda bainhira forma Governu Unidade Nasionál tanba komplikadu.
Atuál Primeiru Ministru ne’e hatete osan iha atu hala’o eleisaun antesipada no osan sei mai hosi orsamentu duodésimu.
Enkontru ne’ebé hala’o ho partidu polítiku sira nu’udar inisiativa hosi Prezidénsia Repúblika atu rona opiniaun hosi partidu polítiku sira, molok foti desizaun hodi hakotu inpase polítika.
Jornalista: Xisto Freitas
Editora: Rita Almeida
