DILI (TATOLI)–Prezidente Komisaun Funsaun Públiku, Faustino Cardoso husu governu atu regulariza funsionáriu kazuál sira, tanba tuir dadus Komisaun Funsaun Públika (KFP) iha 6.000, funsionáriu kazuál mak servisu iha instituisaun Estadu.
“Enkontru ohin mós ami ko’alia kona-ba pessoais kazuias iha instituisaun sira, atu governu ba oin bele regula asuntu ne’e”, Faustino Cardoso esplika Jornalista sira iha Palásiu Governu, hafoin enkontru ho Primeiru Ministru, Mari Alkatiri, Kinta (18/01).
Nia dehan, funsionáriu 6.000 ne’e servisu iha instituisaun estadu la’ós permanente, maibé tuir kontratu.
Sira nia servisu atu ajuda servisu eventuais, projetu, no prestasaun servisu ne’ebé mak nia natureza la permanente. Sira hetan kontratu hosi instituisaun ida-idak, la’ós KFP mak rekruta.
KFP la iha kompeténsia atu revee fali kontratu funsionáriu kazuál sira, tantu funsionáriu kontratadu ho tipu, ajente administrasaun públika ba termu inderteminadu (laiha definisaun to’o bainhira mak sei remata kontratu).
Nune’e mós kazuál sira ne’ebé rekruta define kedas servisu to’o bainhira. Sira hotu responsabilidade instituisaun ida-idak mak halo ligasaun direita ho payroll.
Entretantu hosi ema na’in 6.000, nu’udar funsionáriu kazuál iha instituisaun estadu na’in 285 mak lá kontinua nia kontratu iha Sekretáriu Estadu Juventude no Trabalhu (SEJT) ho razaun sétimu governu to’o ohin loron seidauk iha Orsamentu Jerál Estadu 2018 nian.
Hosi sira na’in 285 ne’e SEJT sei halo hikas avaliasaun ba sira nia dezempeñu hafoin hala’o knaar hikas tuir nesesidade ministériu nian.
(Jornalista: Julia Chatarina)
(Editór : Manuel Pinto)
