iklan

NASIONÁL, EKONOMIA, DILI, MUNISÍPIU

Deskonfia Ular Kontamina Iha Bee Gallon Cool

Deskonfia Ular Kontamina Iha Bee Gallon Cool

Foto/Google.

DILI (TATOLI)–Diretór Operasionál, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Gabriel da Costa, hatete konsumidór bee gallon ho marka Cool hato’o keixa ba AIFAESA tanba sira hemu bee gallon balun hetan fali ular iha bee iha laran.

“Konsumidór sira balun mai keixa no balun lori nia evidénsia hanesan bee gallon marka Cool ne’ebé hola iha loja, kioske katak sira hemu no haree iha ular iha laran, nune’e AIFAESA rasik halo ona koordenasaun ho parte departamentu laboratóriu hodi nune’e submete amostra sira ne’e bá iha Laboratóriu Ministériu Saúde para halo teste”, katak Gabriel iha Matadouru, ohin.

Nia dehan bainhira liuhosi teste laboratóriu mak hatudu sinál negativu sei atua no halo prosesu kedan ba kompañia ne’ebé prodúz bee refere.

“Agora hein de’it rezultadu husi laboratóriu, se pozitivu entaun laiha buat ida, maibé negativu prosesa tuir lei”.

Atu asegura kualidade bee no sasán seluk ne’ebé fa’an iha loza, Lori AIFESA nia naran, Gabriel husu atu konsumidór sira hato’o keixa diretamente ba iha parte AIFESA, enkuantu sosa ou konsume produtu balun ne’ebé fa’an liu ona prazu. Keixa hirak ne’e bele dirije ba departamentu informasaun públika AIFESA nian.

“Kuandu iha evidénsia ruma bele lori no informa atu nune’e bele prosesa bá oin. Se ita-boot sira hetan katak hola buat ruma liu ona prazu entaun ami tenke tun bá haree”.

Entretantu to’o notísia ne’e tun, Tatoli seidauk halo konfirmasaun ho kompañia na’in ou patraun bee gallon Cool, tanba sei iha tentativa nia laran.

(Jornalista : Maria Auxiliadora)

(Editór : Manuel Pinto)

iklan
iklan

Leave a Reply

iklan
error: Content is protected !!