iklan

NASIONÁL, EKONOMIA

AA Sei Implementa Pagamentu Online Iha Futuru

AA Sei Implementa Pagamentu Online Iha Futuru

Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI, (TATOLI) – Autoridade Aduaneira (AA) prepara ona protokolu ida ho banku atu iha futuru bele halo pagamentu ho online ne’ebé husi espetativa autoridade nian implementa iha tinan ne’e hodi evita funsionáriu autoridade deal direta ho osan tanba sitema Asycuda World iha vantajen atu estabelese.

Diretór Jerál AA, José António Fátima Abílio, hatete AA tenke halo koordenasaun ho banku atu iha protokulu ida para fasilidade banku nian, kria nia mekanizmu para simu pagamentu online ho oinsá tanba iha maneira barak uza kartaun kréditu ou débitu atu transfere osan.

“Sistema Asycuda World iha vantazen atu hala’o buat sira hanesan ne’e. Agora halo protokolu ho BNU tanba ami-nia konta kona-ba pagamentu reseita ho BNU. BNCTL ami tenta ona mas presiza servisu hamutuk no tenke estabelese protokulu ida atubele ajuda simu pagamentu reseita, taxa sira husi importadór no esportadór sira”, dehan José iha edifísiu tuan Ministériu Finansa, ohin.

José esplika kona-ba pagamentu taxa nia daudaun iha Dili automátikamente baihira broka sira hatama tiha dokumentu no imprime notice no invoice mak na’in ba selu iha banku.

“Nia bá selu iha banku no iha resibu pagamentu banku nian mak foin nia bá liberta nia merkadoria. Hanesan ne’e mós iha Batugade, iha cabang BNU iha ne’ebá, sira bá selu direta iha ne’ebá. Salele iha rekoñese banku iha ne’ebá laiha, reseita ne’ebé tama alfándega mak simu, hotu tiha mak lori bá hatama fali ba banku iha Suai nian, ita hatene sistema ida ne’e risku, ho sistema Asycuda World ne’e ita buka oinsá mak bele estabelese banku iha ne’ebá no pagamentu online, ita evita funsionáriu autoridade deal direta ho osan”.

Tanba osan ne’e kliente mak tenke bá selu iha banku no la’ós liuhusi funsionáriu sira atubele halo serbisu ho transparente liu.

“Kuandu pagamentu através ema seluk ne’e, ema bele deskonfia embora alfándega hala’o nia knaar loloos hela mas sempre deskonfia, entaun ami buka meiu hadi’a no mekanizmu ida ne’ebé mak transparente para evita ema seluk deskonfia fali funsionáriu autoridade nian”.

Espetativa alfándega nian mak bele implementa pagamentu online ne’e iha tinan 2018, atu kompañia sira ne’ebé mak hatama nia sasán mai maski nia iha estranjeiru mós nia bele transfere osan direta ba konta bankária, maibé la’ós ba ema hotu mas depende ba kompañia sira ne’ebé iha credit no debit card mak foin nia bele uza, enkuantu seluk seidauk bele uza sitema online ne’e nia bele bá direta iha banku hafoin lori fatura hodi liberta sira-nia sasán.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!