DILI, (TATOLI) – Sekretáriu Jerál Partidu Frente Revolusionaria Timor-Leste Independente (FRETILIN), Marí Alkatiri, hateten veteranu sira iha direitu atu ezije harii Governu Unidade Nasionál tanba preokupa ba inpasse polítika iha rai laran.
“Governu Unidade Nasionál ne’e signifika saida. Katak ema sira ne’ebé nia reprezentasaun iha Parlamentu maka tama iha Governu Unidade Nasionál, ka partidu sira ne’ebé la hetan asentu iha Parlamentu Nasionál mós tama. Maibé, tuir ha’u nia kompriensaun, Sétimu Governu ida agora ne’e maka reprezeta ona unidade tanba membru Governu mai hosi partidu oi-oin no ema independente”, katak Marí ba jornalista sira iha Sede Komité Sentrál FRETILIN (CCF), Komoro, sábadu (6/1), bainhira hatán veteranu sira nia ezijénsia ne’ebé hakarak harii Governu Unidade Nasionál.
Nia hateten nia la konkorda harii Governu Unidade Nasionál tanba termu ida ne’e komplikadu, maibé nia konsidera ne’e hanesan konseitu ida ne’ebé la’o daudaun, ne’ebé tenke buka esplika nune’e ema hotu bele kompriende.
Atuál Xefe Governu prefere buka rezolve uluk problema polítika tanba iha partidu opozisaun ne’ebé rejeita buat hotu-hotu.
Jornalista: Xisto Freitas
Editora: Rita Almeida
