VONG Husu Prezerva Identidade Kultura

0
128
Ministru Turizmu iha Sétimu Governu, Manuel Florêncio Canossa Vong

DILI (TATOLI) – Ministru Turizmu Manuel Vong afirma, Timor-Leste presiza tebes halo prezervasaun ba identidade kultura tanba mundu globalizadu nune’e bele sai ameasa atu halakon Timor-Leste nia identidade orijen.

“Ita sei la haktuir héransa ne’ebé bei’ala sira husik hela mai ita hanesan uma lisan ho uma lulik sira ne’ebé konsidera iha valór kulturál signifika globalizasaun sei lori ita halakon identidade orijinál Timor-Leste nian,” Manuel Vong hato’o iha serimónia kompetisaun talentu múzika no dansa kulturál entre universidade sira iha Timor-Leste iha Sentru Konvensaun Dili (CCD) foin daudaun.

Múzika, Tuir Ministru Vong Timoroan iha ona talentu, no múzika prinsipál ba Timor ho múzika mak lori Timor ba mundu no lori mundu mai Timor no ba Timoroan hotu.

Ho ida ne’e mak Programa talentu múzika ne’e importante basa tuir karater kultura Timor-Leste nian rasik.

“Ita hotu haksolok, hawelok no hahi’i ita nia kultura, ita nia kultura mak ita nia identidade no identidade ita nian tenke mai duni hosi rai ida ne’e.”

Nune’e atividade hirak ne’e hanesan prosesu aprendizajen liuhosi edukasaun formál oinsá estudante sira bele promove identidade kulturál Timor-Leste nian liuhosi dansa, múzika no seluk tan, maibé presiza mós dezenvolve no mantein oinsa atu prezerva identidade kulturál.

Tuir planu, nia dehan iha tinan oin sei halo tan kompetisaun hanesan hodi oinsá diversifika liu tan Timor-Leste nia talentu la’ós de’it iha múzika maibé iha dansa, iha arte no seluk tan.

“Tuir planu Ministériu Turizmu nian katak eventu ne’e sei sai eventu anuál ba Ministériu Turizmu nia no la’ós iha Dili de’it maibé realiza iha Munisípiu 12 inklui RAEOA,” Ministru Vong promete.

Nia dehan ho eventu sira ne’e mak nu’udar meius ida hametin unidade nasionál, identidade nasionál no orijinalidade Timor-Leste nian no autentisidade turizmu Timor-Leste nian.

(Jornalista : Zezito Silva)

(Editór : Manuel Pinto)

HUSIK IDA HATÁN