UNTL Partilla Teoria Kontabilidade

0
41
Ilustrasaun

DILI (TATOLI)-Universidade Nasionál Timor Lorosa’e (UNTL), liuhosi Fakuldade Ekonomia no Jestaun (FEJ) konvida ensinu superiór privada sira iha kapitál Dili hodi reforsa teoria ne’ebé aprende iha sala-de-aula, liu-liu kona-ba akontabilidade.

Tuir Dekanu Fakuldade Ekonomia no Jestaun (FEJ), Fernando Baptista Anuno, asaun ida ne’e atu halo balansu entre pratika no teoria ne’ebé estudante sira hetan ona durante aula aprendizajen, hahú hosi semestre rua, haat no neen.

“Ha’u hanoin katak inisiativa ida ne’e di’ak atu nune’e bele tenta mós hatudu sira-nia kapasidade oinsá mak atu bele levanta kestaun importante husi kontabilidade,” akresenta dekanu Fakuldade Ekonomia no Jestaun (FEJ), Fernando Baptista Anuno, iha kampus resende, UNTL, Dili, Tersa (05/12).

Partilla matenek ne’ebé organiza hosi fakuldade ekonomia ne’e realiza liuhosi semináriu ho tema: “Papél Kontabilidade hodi Dezenvolve Sistema Finanseiru iha Timor-Leste”

Nia dehan, kontabilidade ne’e hanesan parte importante ba iha setór finanseiru, atu nune’e bele hatene katak oinsá mak kada sidadaun bele kontribui pozitivu ba ita-nia Kresimentu ekonómiku.

Kontribuisaun tasa importante kuandu mai husi prestasaun konta ne’ebé di’ak. Tanba ne’e, estudante sira bolu oradór mai husi Ministériu Planu no Finansa inklui setór privada hodi partilla informasaun detalla kona-ba kontabilidade.

“Sistema finanseira ne’ebé mak asegura, ohin loron mai husi Ministériu Finansa rasik oinsá mak mai tenta hato’o informasaun ba ita-nia estudante sira,” dekanu FEJ ne’e hateten.

Nia haktuir, perfil importante sira ne’ebé mak estudante sira hetan mak oinsá atu bele sai auditoria, sai jestór finanseira, sai jestór ba kontabilidade, fiskaliza-door, ida ne’e atu bele sukat sira-nia kompeténsia mai husi parte teoria no prátika.

“Konvida mós estudante sira mai husi universidade privada nune’e fahe esperiénsia katak Ministériu Finansa nia papél boot ba iha nasaun ida ne’e, oinsá mak bele estabelese sistema finanseira ne’ebé mak adekuadu atu nune’e bele kontribui mós ba dezenvolvimentu nasionál, liu-liu iha área finanseira, ba iha setór ekonomia enjerál,” tenik nia.

Entretantu semináriu ne’ebé organiza husi UNTL ne’e, oradór mai husi Ministériu Planu no Finansa mak, Diretór Nasionál Kontabilidade, Ernesto da Conceição Silva.

Husi setór privadu mak reprezenta Market Development Facility, programa setór privadu, Manuel Soares, nu’udar mós dosente ida iha universidade públika únika Timor-Leste nian.

(Jornalista: Rafy Belo)

(Editór : Manuel Pinto)

HUSIK IDA HATÁN