Tinan Tolu Mai SERVE Sei Ladepende ba OJE

0
71

DILI, (TATOLI) – Servisu Rejistu no Verifikasaun Emprezariál (SERVE) nia planu iha tinan tolu oin mai sei ladepende ba Orsamentu Jerál Estadu (OJE) tanba konsege ona koleta reseita husi lisensiamentu nian.

Diretór SERVE, Florêncio Sanches, hatete bele kolleta fee ou kustu husi lisensiamentu ne’ebé iha no bainhira koleta hotu bele ona kobre kustu operasionál ne’ebé SERVE iha.

“Hahú husi tinan oin ami bele hamenus despeza husi Estadu nian. Ba tinan tolu oin mai SERVE sei  lahetan osan husi Estadu, bele hamriik rasik ho nia fee ne’ebé nia halo koleta, maibé lei ne’e mós hatete mezmu ami koleta SERVE sei lafoti osan ho liman”, Florêncio hatete iha Matadouru, kinta, (14/12).

Maibé sei kria kondisaun ida katak banku komersiál haat ne’ebé daudaun ne’e iha mai kompete iha konkursu no ida ne’ebé manán mak sei tuur iha edifísiu SERVE nian.

“Banku ida ne’e mak sei koleta fee sira ne’ebé mak selu mai SERVE no banku ida ne’e mak sei relata ba tezoreiru nasionál depois SERVE haree tuir ida ne’e mak lori nia proposta ba ezekusaun tinan ida nian. Sé osan restu iha entrega ba Estadu, SERVE uza de’it osan ne’ebé sufisiente ba nia operasionál de’it, ida ne’e mak sei akontese”.

Florêncio hatutan iha tinan 2018, SERVE sei uza porsentu 100 husi OJE, maibé iha tempu ne’ebá koleta ona fee no tama iha debate OJE 2019, husu ona atu labele fó porsentu 100 maibé porsentu 50 tanba SERVE iha ona osan rasik.

“Depois tinan tuir mai ami sei husu ko’a tan porsentu 70, fó de’it ami porsentu 30 tanba iha ona. Ha’u aprezenta ba Primeiru-Ministru katak tinan tolu nia laran fó ami zero, lalika fó tan osan ami, maibé ami mak sei fó tan osan ba Estadu tanba nia jestaun ne’ebé halo daudaun ne’e iha hotu ona”.

Tanba SERVE labele simu diretamentu osan husi kliente sira entaun tenke iha sistema ida no daudaun iha tiha ona.

“Sistema ne’ebé atu uza ne’e, ha’u sei hatama pedidu ofisiál ba Primeiru-Ministru para aprova hodi bele bolu ida ne’ebé agora utiliza iha Malázia tanba sira númeru 10 iha mundu”, katak.

Hatutan tan: “Sira utiliza sistema ida nunka haree osan, maibé tranzasaun la’o entre sistema ho sistema. Ne’ebé semana oin ami halo preparasaun, sé bele karik depois Natál ka tinan foun ami hatama proposta ofisiál hodi lori ba Konsellu Ministru para aprova programa sira ne’e. Espera katak sei mai ho polítika Governu nian ne’e atu dezenvolve setór privadu sira atubele di’ak liután no labele dependente ba OJE”.

Jornalista: Maria Auxiliadora

Editora: Rita Almeida

HUSIK IDA HATÁN