Tinan Ne’e Sidadaun Estranjeiru 856 mak Viola Vistu

0
106
Foto google

DILI, (TATOLI) – Adjuntu Diretór Servisu Migrasaun, Inspetór Xefe Ricardo Moniz, hateten dadus provizóriu nota sidadaun estranjeiru 856 maka uza vistu turista hodi hala’o servisu iha Timor-Leste hahú fulan-janeiru to’o dezembru 2017.

Servisu Migrasaun kaptura estranjeiru hirak ne’e bazeia ba lei migrasaun no azilu númeru 9/2003 hodi halo kontrolu ba sidadaun estranjeiru ne’ebé tama hodi hela iha Timor-Leste.

ʺTuir dadus sidadaun Indonézia barak liu, depois  Xina, Filipina, Amerika, Austrália, Portugal, Banglades, India maibé barak liu sidadaun sira iha aziaʺ, informa ba jornalista sira iha ninia servisu fatin Kaikoli, ohin.

Hosi númeru ne’e, sidadaun estranjeiru 21 tenke haruka fila tanba viola bebeik vistu no 800 resin selu multa ba kofre Estadu durante janeiru to’o novembru ho montante millaun tolu resin, enkuantu  fulan-dezembru sei iha prosesu selu multa.

“Sira mai ho vistu turista maibé hala’o fali servisuʺ, hatutan. Nune’e mós bazeia ba dadus hosi janeiru to’o meadu dezembru, sidadaun estranjeiru 118.915 maka tama teritóriu no sai hosi teritóriu hamutuk ema 122.522.

Inspetor Xefe ne’e hateten servisu migrasaun halo hela instalasaun ba sistema foun hodi kontrola sidadaun estranjeiru ne’ebé tama no sai iha área fronteira.

ʺAgora dadaun ami instala hela ami nia sistema jestaun fronteira, sietema ida ne’e hetan apoiu husi migrasaun Portugal, uza governu nia osan, sistema ne’e atu deteta ohin loron ema tama no sai husi teritóriu ema nain  hira entaun sede sentrál mos akapta kedas númeru sira ne’eʺ, hatutan.

Iha posibilidade servisu migrasaun sei implementa sistema foun ne’e iha tinan foun 2018.

Jornalista: Agapito dos Santos

Editora: Rita Almeida

HUSIK IDA HATÁN