Timor Sei La Iha Krize Tan

0
610
Xefe Estadu Maior FALINTIL–Forsa Defeza Timor-Leste (F-FDTL), Majór Jenerál Lere Anan Timur, bainhira hatan jornalista sira iha Palásiu Prezidente Nicolau Lobato Bairo Pité, ohin. Foto mídia PR

DILI (TATOLI)—Komandante FALINTIL-Forsa Defeza Timor Leste (F-FDTL), Major Jenerál Lere Anan Timur afirma nia parte sei garante pas no estabilidade relasiona ho konjuntura polítika ohin loron nian, no sei la krize foun mak sei mosu iha Timor.

ʺIta bele halo Buat Hotu-hotu mais krize sei la mosu hanesan esperiénsia ida ne’ebé ami atravesa iha tinan 1974 iha ai-laran,” Lere Anan hato’o asuntu ne’e ba jornalista sira hafoin relata situasaun seguransa ba Prezidente da Repúblika, Francisco Guterres Lú Olo, iha Palásiu Prezidensiál, Bairru-Pité, Kuarta (6/12).

Lere kompara iha tinan 1974 momentu halai iha ai-laran mosu mós krize ba lideransa sira iha momentu ne’ebá, maibé sira (Lere ho nia maluk) nu’udar soldadu tuur hakmatek hodi fó tempu ba maun (komandante) sira rezolve no soldadu sira fó apoiu de’it.

Haree ba esperiénsia liga ho situasaun polítika ohin loron (Governu Minoria Vs Parlamentu Maioria) nu’udar ema rezisténsia Lere husu lideransa sira atu komunga no tau iha pratika “Sentidu Estadu”

“Ita nia rai presiza nasionalizmu, patriotizmu ba ita nia rain,” Lere hato’o.

Hodi afirma nia pozisaun nu’udar ulun boot ba instituisaun defeza Timor-Leste nia katak sei fó apoiu tomak ba desizaun saida de’it mak Prezidente Repúblika sei hola, hodi solusiona problema ne’ebé ohin loron Timor hasoru. Maski, iha Parlamentu Nasionál tuir Lere nia haree iha ona grupu balun mak tenta atu hafahe veteranu sira nia unidade.

“Ita veteranu sira ne’ebé sei moris la bele soe malu, hamutuk nafatin tau opiniaun hamutuk hodi lori nasaun ba oin,” Lere husu ba nia kompatriota da luta “Veteranu” sira.

(Jornalista : Agapito dos Santos)

(Editór : Manuel Pinto)

HUSIK IDA HATÁN