Timor-Leste Lakon Millaun 250 Kada Tinan Tanba Peska Ilegál

0
34
Ikan. Foto/Google.

DILI, (TATOLI) – Kálkulu ne’ebé Ministériu Agrikultura no Peska (MAP), liuhusi Diresaun Jerál Peska halo katak kada tinan Timor-Leste lakon osan maizumenus millaun U$250 tanba peska ilegál.

Diretór Jerál Peska, Acácio Guterres, hatete bazeia ba informasaun ne’ebé iha ró ilegál até 30 ka 50 mak kaer ikan iha tasi Timór.

“Entaun ita bele lakon orsamentu dólar millaun 250, maibé ida ne’e la’ós osan de’it, ita-nia ambiente (tasi) bele mós estraga tanba ró sira ne’ebé mai ne’e laharee ba ekipamentu saida mak uza, ekipamentu ne’ebé bandu mós sira bele uza”, Acácio hatete iha Komoro, horisehik.

Enkuantu ró ne’ebé Governu fó lisensa utiliza de’it ekipamentu ne’ebé tuir lei haruka mas sasán balun ne’ebé sei halo revizaun bainhira atu hakail ikan ne’e tenke troka foun.

“Ró kuandu ilegál ona ne’e kualkér saida de’it mak iha nia uza, atu estraga ita-nia ambiente ka rekursu ne’e bele uza de’it atubele hetan sira-nia lukru”.

Nune’e presiza ativa fali ró sira ne’ebé daudaun ne’e governu hapara, prezensa ró ne’ebé Governu fó lisensa dimuniu peska ilegál sira tanba iha ró leten ne’e uza bandeira Timor-Leste nian.

“Tanba ró sira la bá ona, ita-nia prezensa iha territóriu laiha entaun ita labele kontrola ita-nia tasi no sira bele mai fali”.

Husi estimasaun númeru osan ne’ebé Timor-Leste lakon ne’e tanba haree ba ró ilegál ne’ebé hakaer ikan sira iha tasi.

“Ró ne’e 30 até 50 entaun ita foti médiu de’it ró 40 ne’ebé loroloron kaer ikan, pur ezemplu tonelada 2 ka tolu kada loron entaun vezes ba tinan ida ita foti loron 300 hanesan ne’e ikan hira mak sira kaer no ikan sira ne’e fa’an karik nia folin maka maizumenus tonelada 300 ne’ebé mak lakon”.

Jornalista: Maria Auxiliadora

Editora: Rita Almeida

HUSIK IDA HATÁN