Tenke Define Polítika Komérsiu iha Timor-Leste

0
237
António da Conceição. Foto Antonio Goncalves

DILI, (TATOLI) – Ministru Komérsiu no Indústria (MKI), António da Conceição, hatete tenke define polítika komérsiu ida iha Timor-Leste tanba ohin loron komérsiu país ne’e dependente liu ba atividade importasaun maka oinsá halo balansu ida hodi marka inísiu ruma kona-ba atividade esportasaun ne’ebé presiza atu hahú.

“”Ami sei haree filafali planu saida mak importante atu dezenvolve komérsiu, indústria iha Timor-Leste, buat balun ne’ebé ami hahú hanoin atubele planeia ba 2018 nian hakarak estabelese polítika kona-ba komérsiu iha Timor-Leste tanba polítika ida ne’ebé ohin loron ita sempre temi katak ita-nia komérsiu dependente liu ba atividade importasaun, oinsá mak ita bele halo balansu ida se la’ós atu halo fifty fifty pelumenus hahú marka atividade esportasaun”, katak António iha ámbitu avaliasaun anuál MKI nian iha Sentru Konvensaun Dili, ohin.

Iha área indústria nian hahú hanoin ona atu halo estudu viabilidade ida para parke industriál ne’ebé presiza atu halo iha Tibar, Kovalima, no Betanu hodi komplementa dezenvolvimentu indústria petrokímika iha área kosta súl nian.

“Iha área komérsiu sei halo estudu viabilidade hodi haree filafali no eleva tan komérsiu iha fronteira. Labele nafatin komérsiu ida ne’ebé daudaun iha merkadu tradisionál iha fronteira, tenke eleva nia estatutu tanba dezafiu sira ne’ebé ita hasoru agora daudaun komérsiu Timor-Leste labele sai de’it fatin ida ne’ebé atu espande komérsiu husi Indonézia, maibé komérsiu liuliu iha área fronteira tenke halo diferensa ida ho komérsiu ne’ebé halo ho Indonézia liuliu haree kona-ba marka, marka saida mak ita presiza dezenvolve hodi bele halo diferensa iha ita-nia komérsiu área fronteira nian”.

Eis Ministru Edukasaun ne’e hatutan tanba fronteira hanesan zona franka ida ne’ebé presiza atu estabelese marka iha fatin refere.

Sobre indústria nian sei estabelese filafali unidade ida ne’ebé maka integra ida ministériu nia laran mak sentru indústria inkubadora hodi bele hahú ona dezenvolve indústria sira iha laran no sai hanesan fatin promosaun ba indústria nian rasik ne’ebé sei integra iha lei orgánika ministériu nia ne’ebé sei mai.

Jornalista: Maria Auxiliadora

Editora: Rita Almeida

HUSIK IDA HATÁN