Temporariamente, PR La Simu Bainaka

0
487
Prezidente Repúblika, Francisco Guterres Lú Olo.

DILI (TATOLI)—Prezidente Repúblika (PR), Francisco Guterres Lú Olo, temporariamente, la simu bainaka sira hosi Governu no entidade oi-oin hosi rai laran no rai liur nian tanba Prezidente Repúblika oras ne’e foku hela ba asuntu balun ne’ebé importante ba nasaun nia vida.

Kona-ba asuntu importante ne’e, fonte ofisiál hosi Palásiu Prezidénsia Repúblika la deskreve klaru tanba ne’e konfidensiál maibé la sees hosi impasse polítika iha rai laran.

Maske la simu bainaka hahú hosi 18 Dezembru, fonte haktuir, Xefe Estadu Lú Olo kontinua tama serbisu hanesan baibain.

“Prezidente Repúblika sei hahú hikas nia atividade balun hanesan Natal hamutuk ho funsionáriu Palásiu Prezidénsia Repúblika inklui jornalista sira ne’ebé destakadu iha palásiu refere iha loron 29-31 Dezembru mai ne’e,” fonte ne’e informa ba Ajénsia TATOLI via telefónema.

Nia hatutan bainaka sira mós kontinua rejista atu soru-mutu ho Prezidente Repúblika iha tempu oin mai karik Xefe Estadu hahú fali nia programa simu bainaka.

Fonte dehan, loloos, ohin (20/12), Prezidente Repúblika partisipa iha seremónia atribuisaun Karteira Profisionál ba jornalista sira ne’ebé organiza hosi Konsellu Imprensa, maibé tanba okupadu, Prezidente delega fali Xefe Kaza Sivíl Prezidénsia Repúblika, Francisco Vasconselhos.

(Jornalista: Xisto Freitas)

(Editór : Manuel Pinto)

 

HUSIK IDA HATÁN