Situasaun Rai Laran Hakmatek

0
251
Ministru Defeza no Seguransa (MDS), José Agostinho Sequeira “Somotxo”.

DILI (TATOLI)—Ministru Defeza no Seguransa, José Agostinho Sequeira “Somotxo” hala’o enkontru ho Prezidente Repúblika, Francisco Guterres Lú Olo, hodi ko’alia kona-ba pontu situasaun iha Timor laran tomak ba nível seguransa no estabilidade polítika.

Somotxo haktuir, normalmente, Komandante Supremu FALINTIL- Forsa Defeza Timor-Leste (F-FDTL) atuál Xefe Estadu fó orientasaun foun ba sira bainhira problema ruma mosu. Maibé, nia dehan, ohin loron situasaun normál (hakmatek).

“Prezidente Repúblika mós hatene katak laiha novidade para atu hato’o ba Ministru Defeza no Seguransa tanba situasaun di’ak hela,” nia hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e.

Kona-ba operasaun iha loron Natal no Tinan Foun, Somotxo informa, Diretiva Minstériu Seguransa no Defeza fó sai ona atu halo operasaun iha loron Natal to’o Tinan Foun. Operasaun ida ne’e atu kontrola fugetes, paison no atua violasaun órden públiku.

Nia hatutan komandante sira hosi forsa rua (PNTL no F-FDTL) mós sei indika fatin balun atu tiru sa’e ba leten iha pasajen tinan tuan ba tinan foun. “La’ós atu tiru arbiru de’it iha sidade laran tanba dala barak maka halo komunidade liu-liu ferik, katuas no labarik sira hakfodak,” governante ne’e afirma.

(Jornalista: Xisto Freitas)

(Editór : Manuel Pinto)

HUSIK IDA HATÁN