SEJT Halo Inspesaun Ba Negosiante Estranjeiru Viola Lisensa Negósiu

0
165
Sekretáriu Estadu Juventude no Traballu (SEJT), Nívio Leite Magalhães.

BAUCAU (TATOLI)—Sekretáriu Estadu Juventude no Traballu (SEJT), Nívio Leite Magalhães ho nia ekipa halo inspesaun ba negosiante estranjeiru sira ne’ebé halo negósiu sasán iha parte leste hanesan Viqueque no Baucau.

Objetivu halo inspesaun ne’e, Sekretáriu Estadu Juventude no Traballu, Nívio Leite Magalhães esplika katak atu buka deteta negosiante estranjeiru sira hosi Xina, Indonézia no nasaun sira seluk ne’ebé viola lisensa negósiu iha Timor.

“Ami deteta ona katak negosiante estranjeiru balun halo negósiu laiha lisensamentu negósiu hahú hosi Dili, Viqueque no Baucau ne’ebé ami halo tiha ona inspesaun ba,” Nívio dehan ba negosiante lokál sira iha Merkadu Kota Baru, Baucau, sábadu (9/12) lorokraik, hafoin fila hosi inspesaun iha Munisípiu Viqueque.

Nia esplika katak negosiante estranjeiru ne’ebé laiha lisensa negósiu, Governu sei hapara tanba ida ne’e la fó kontribuisaun ba Timor liuhusi tasa (impostu) no sei haruka sai hosi Timor bainhira negosiante hirak ne’e mai ho vistu turista.

“Buat hotu-hotu ne’ebé halai ba iha negósiu, tenke hetan lisensiamentu. Sé lae, ema sira hosi nasaun seluk nadodon mai halo negósiu iha Timor hodi hamate fali negosiante timoroan sira,” Nívio esklarese no hatutan katak atividade inspesaun ne’e sei hala’o iha Timor laran tomak.

Iha biban ne’e, negosiante balun iha Merkadu Kota Baru Baucau sente orgullu ho prezensa Sekretáriu Estadu Juventude no Traballu tanba bele kontrola negosiante estranjeiru sira ne’ebé maka fó impaktu negativu ba negosiante timoroan sira.

(Jornalista: Xisto Freitas)

(Editór : Manuel Pinto)

HUSIK IDA HATÁN