Ró Peska Ilegál Iha Duni Tasi Timór Nian

0
107
Foto/Google.

DILI, (TATOLI) – Diretór Jerál Peska, Ministériu Agrikultura no Peska (MAP), Acácio Guteres, rekoñese ró ne’ebé hala’o atividade peska ilegál daudaun ne’e barak duni iha tasi Timor-Leste nian.

Diretór Jerál hatutan iha semana kotuk nia rasik haree ró ilegál iha parte Iliomar (Lautein) no Watukarabau (Vikeke), iha duni ró balun ne’ebé iha ne’ebá no tama ilegalmente maibé Diresaun Jerál labele halo buat ida no koordena de’it ho instituisaun relevante sira.

“Hanesan Polísia Marítima ka Komponente Navál maibé komponente Navál no Marítima laiha meiu para bele bá to’o iha parte súl ne’ebá. Ne’ebé husi parte peska nian labele halo buat ida no ita haree de’it, tanba ne’e mak to’o agora seidauk foti medida ka buat ruma”, Acácio hatete iha Komoro, ohin.

Maski nune’e Diresaun Jerál Peska hakarak ka lakohi husu ba Governu atu reforsa forsa marítima para bele iha kapasidade atu kontrola.

“To’o agora daudaun ita-nia meiu ne’ebé iha ne’e só iha de’it parte norte ne’e, seidauk bele to’o iha ne’ebá (kosta súl nian) entaun presiza duni haree ró ruma ne’ebé ho kapasidade boot nomós ho fatin apoiu iha parte súl ne’e tenke kria ona postu ruma iha ne’ebá liuliu portu para ita-nia komponente navál sira keta bá halo patrulla ka kontrola sira mós iha fatin ruma seguru atubele asegura sira-nia ró ho ema sira ne’ebé serbisu”.

Hatutan tan: “Ita iha satélite maibé satélite ne’e foin monitór de’it ró sira ne’ebé ita fó lisensa, ita loroloron bele monitór sira bá ne’ebé ne’e ita hatene hela, mas ró ilegál ne’e mak susar uitoan tanba ne’e mak hakarak ka lakohi tenke reforsa duni komponente navál ho polísia marítima para bele iha kapasidade atu kontrola”.

Timor-Leste mós iha akordu ho nasaun viziña Indonézia no Austrália ne’ebé loroloron komunika ba malu maibé meiu atu atua peska ilegál mak difisil, maibé sobre informasaun sempre pasa ba malu tanba iha kooperasaun di’ak entre nasaun rua ne’e.

Jornalista: Maria Auxiliadora

Editora: Rita Almeida

HUSIK IDA HATÁN