Ró Ospitál Xina Sei Halo Asisténsia Médika Gratuita

0
132

DILI, (TATOLI) – Governu Timor-Leste hato’o benvindu ba ró ahi ospitál Xina, ho naran ARCA DA PAZ ne’ebé sei hala’o misaun pás no umanitária durante semana ida hodi fó asisténsia médika gratuita ba populasaun, veteranu, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

“Bemvindu mai Timor-Leste, embaixadór, almirante ofisiál superiór sira no mariñeiru sira ne’ebé mak halo ona viajen naruk hodi to’o Timor-Leste”, Ministru Defeza no seguransa, José Agostinho Siqueira Somotxo, perante autoridade xineza sira iha portu Dili, kinta (14/12) relasiona ho prezensa ARCA DA PAZ.

Ita kontinua serbisu hamutuk durante semana ida, programa sira ne’ebé sei tuir mai, programa no konsulta barak sei hahú, aban no loron tuir mai, “Seja Bem  vindo”, deseja tan.

Governante ne’e mós agradese ho prezensa ró ahi ospitál Xina, ARCO DA PAZ hodi fó asisténsia médika ba timoroan sira.

“Agradese ba valiozu apoiu ne’ebé mak Repúblika Populár Xina ba Repúblika Demokrátika Timor-Leste, ba povu no militár iha área saúde, konsulta médika husi espesialista sira no asisténsia ospitalár hodi enaltese ita-nia esforsu konsertadu iha kooperasaun entre Xina no Timor-Leste iha área seguransa defeza, sívil no saúde”.

Somotxo akresenta Ró ARCA DA PAZ mai tanba konvite no kooperasaun entre Timor-Leste ho Xina ne’ebé hala’o ona durante ne’e.

Vizita ne’e mai kulmina iha konsolidasaun relasaun diplomátika no kooperasaun iha nível militár.

Tinan hirak ikus ne’e, hametin liutan relasaun amizade militár tanba Repúblika Populár Xina apoia ona iha nível kooperasaun, nomós nível dezenvolvimentu forsa armada, tenik Somotxo.

Ministru ne’e haktuir apoiu balun ne’ebé mak haree, kazu konkretu edifísiu Ministériu Negósiu Estranjeiru, edifísiu Palásiu Prezidenziál no diretamente kuartel jerál forsa armada ne’ebé agora akumula ministériu defeza.

“Repúblika Populár Xina mai hodi kontinua akordu sira ne’ebé ita estabelese, finalizadu akordu asinadu Repúblika Populár Xina iha área defeza ho Ministériu Defeza no Seguransa, iha fulan hirak kotuk kona-ba apoiu tékniku profisionál, apoiu iha nível ekipamentu prinsipalmente iha formasaun no komunikasaun ba forsa armada sira”, katak tan.

Komandante ró ahi ospitál ARCA DA PAZ, Gun Bailin, hodi ekipa serbisu nomós xineza sira agradese ho sinseru ba konvite husi governu Timor-Leste ba dizpozisaun no preparasaun delikada sira husi Ministériu Defeza no Seguransa, Ministériu Saúde, Ministériu Edukasaun, Ministériu Transporte no Komunikasaun, Forsa Defeza, Polísia Nasionál no seluk tan.

Gun Bailin hateten ARCA DA PAZ nakonu ho pás. Ró ahi ospitál ne’e sai husi Xina hodi kumpri misaun ida ho naran armonia 2017. Sira halo ona vizita durante loron 141 iha nasaun afrikanu sira, hafoin loron 18 halo viajen to’o Timor-Leste.

Nu’udar ró ospitál profisionál dahuluk iha mundu kadavez asume misaun sagrada hodi salvaguarda pás no salva vida.

Nune’e mós, ARCA DA PAZ mai nakonu ho amizade no foin dahuluk halo vizita mai Timor-Leste hodi hametin amizade no koñesimentu no haluan tan kooperasaun.

Sira sei estadia iha Timor-Leste durante semana ida no sei fó asisténsia no konsulta gratuita ba populasaun sira, hahú ohin to’o tersa (20/12).

“Ró ahi ospitál ARCA DA PAZ sei mai nafatin iha futuru, maun alin timoroan sira nu’udar viziñu di’ak, amigu no parseiru di’ak ne’ebé povu xines sempre preokupa no importa bainhira povu Timor-Leste presiza, governu Timor nesesita”, afirma.

Hatutan tan ARCA DA PAZ sempre disponível hodi apoia no presta asisténsia médika ho kualidade aas liu no efisiénsia.

ARCA DA PAZ konstrui iha Xina ho intensaun atu fó asisténsia médika iha tasi ho kompromísu ida katak manten pás, estabilidade nomós amizade.

Ró ne’e konstrui nu’udar mós kontinuasaun polítika no estratéjia marítima Xina nian iha 23 abril 1949.

Ró nia naruk metru 178 no todan 14.300 ton. Área médiku nian deskobre área 4.000 m2 kompostu husi sala operasaun jerál neen no sala operasaun intensiva rua.

ARCA DA PAZ kumpleta ho ekipamentu foun no modernizadu, profisionál saúde espesializada no kualifikadu ho kualidade internasionál inklui profisionál mariña sira seluk tan.

Ró ne’e durante nia misaun hahú husi 2010 to’o 2015 halo ona konsulta no fó asisténsia médika gratuita ba nasaun 29 iha rejiaun Ázia, Áfrika, Amérika no Oseania ba ema kuaze rihun 120, iha Xina no populasaun sira iha mundu.

Jornalista: Rafy Belo

Editora: Rita Almeida

HUSIK IDA HATÁN