Primeiru-Ministru Husu Funsionáriu Kontratadu Lalika Laran Taridu

0
1667
Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR

DILI, (TATOLI) – Primeiru-Ministru, Marí Alkatiri, husu ba funsionáriu kontratadu sira atu lalika laran taridu ba situasaun polítika ne’ebé oras ne’e akontese.

Alkatiri hateten governu sei hanaruk kontratu ba funsionáriu kontratadu sira bainhira iha orsamentu. ʺLalika laran taridu tanba ami sei estuda hela, governu ida ne’e lakohi halo ema ki’ik sira sai fali vítimaʺ, dehan Xefe Ezekutivu ba jornalista sira iha Palásiu Prezidensiál Nicolau Lobato Bairo Pité, hafoin hasoru malu ho Prezidente Repúblika, Francisco Guterres Lú Olo, ohin.

Xefe Governu hatutan governu ne’e sei la husik funsionariu kontratadu sai vítima ba drama polítika ne’ebé oras ne’e akontese.

ʺHa’u la’ós ameasa funsionáriu kontradu sira maibé, ami haree hela osan iha ka la’e no bele halo kontratu ba fulan ida, fulan rua no tolu ami bele halo tan, maibé ami lakohi funsionáriu sira maka sai vítima ba polítikaʺ, tenik tan.

Tuir dadus totál funsionariu públiku ne’ebé Komisaun Funsaun Públika rejista porvolta 35.000 ne’ebé fahe ba permanente rihun 27.000 no restu fahe ba kontratadu no kazuais.

Jornalista: Agapito dos Santos

Editora: Rita Almeida

HUSIK IDA HATÁN