Primeiru-Ministru Fiar Opozisaun Vota Afavór ba Programa Governu

0
347
Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairru Pité, ohin. Foto mídia PR

DILI, (TATOLI) – Primeiru-Ministru, Marí Alkatiri, fiar katak programa Governu ne’ebé tempu besik sei aprezenta ba Parlamentu Nasionál bele pasa tanba opozisaun sira labele ona halo Mosaun Rejeisaun ba dala rua atu vota kontra.

“Ba ha’u programa pasa ona maibé, ami kontinua haruka programa ba parlamentu ho anotasaun atu bele esplika ba deputadu opozisaun sira ne’ebé foti duvida, nune’e sira bele kumpreende programa”, hatete Xefe Ezekutivu ba jornalista sira iha Palásiu Prezidente Nicolau Lobato Bairru Pité, hafoin informa ba Xefe Estadu kona-ba programa governu ho orsamentu retifikativu.

Marí Alkatiri haktuir loloos partidu Kongresu Nasionál Rekonstrusaun Timor (CNRT-sigla portugés) hatama mesak mosaun rejeisaun ida no Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) bele hatama rejeisaun ida tan, nune’e bele hetan votu dala rua. Katak, rejeita dala ida mosaun A, no vota tan fali mosaun B hodi rejeita para programa labele liu.

Xefe Governu hatutan konstituisaun RDTL rejeita programa Governu ne’e só dala rua de’it. Tan ne’e, tuir nia la divia partidu tolu ne’e hamutuk halo rejeisaun dala ida de’it no loloos halo mosaun rejeisaun rua.

Jornalista: Xisto Freitas

Editora: Rita Almeida

HUSIK IDA HATÁN