Primeiru-Ministru Agradese Família Lejendáriu Maulohi

0
166
Primeiru-ministru Marí Alkatiri atribui sertifikadu méritu rekoñesimentu ba família enlutada saudozu artista lejendáriu Siku Mauloli. Foto: GPM

DILI, (TATOLI) – Primeiru-Ministru, Marí Alkatiri, hodi governu konstitusionál da-hitu hato’o obrigadu ba família enlutada saudozu artista lejendáriu, Francisco de J. Brite tanba defende identidade Timor-Leste (TL) liuhusi múzika.

“Maulohi konsege hatudu katak semak kanta, semak artista, ema ne’ebé nia vokasaun halibur ema hotu. Biar ema hatene Maulohi ne’e FRETILIN maibé bainhira nia kanta ema hotu-hotu gosta nia, rona nia kanta”, hateten Xefe Governu, foin lalais ne’e iha Palásiu Governu bainhira fó sertifikadu méritu rekoñesimentu ba família ne’ebé organiza husi ALMAMOR (Associação de Músicos de Timor-Leste).

Xefe governu reforsa artista lejendáriu Siku Maulohi konsege halibur ema hotu, tanba ne’e hanesan primeiru-ministru sétimu governu nia dehan haburas fila fali frente artistíka, haburas fali kultura, haburas fali identidade. Múzika buat ida ne’ebé fó forsa liu ba buat sira ne’e hotu, figura bele fó forsa ba buat sira ne’e hotu.

“Tanba ne’e ohin fó sertifikadu ida; ha’u hakarak fó informasaun, foin loron hirak ba kotuk Prezidente Repúblika, Francisco Guterres Lú-Olo telefone mai ha’u dehan ita tenke kria kondekorasaun ida ba artista sira”, haktuir.

Tanba ne’e governu ho prezidente repúblika fó ba Parlamentu Nasionál halo serbisu ida para husi ne’e ba oin, ita hatene fó valór ba ita-nia artista sira.

“Ha’u la iha liafuan barak ba família tomak, maibé obrigadu tanba iha ema ida hanesan Maulohi, bele duni fanu ita fila fali to’o nia mate”, hatutan.

Hodi reforsa tan: “Obrigadu ba família, ha’u hatene todan tebes; kontinua ba ninia legadu ida ne’e, ninia eransa ida ne’e, ho ninia múzika nia sei hamutuk nafatin ho ita”.

PM mós husu ba família no jerasaun foun sira atu kontinua valoriza kultura no prinsípiu sira tanba kontinuidade ne’e importante tebes, la’ós de’it iha polítiku sira, la’ós de’it atu sai deputadu, la’ós de’it atu sai ministru, kontinuidade iha arte kultura bele hametin nasaun ida ne’e.

“Ninia mate hamoris fali sentidu ida ba ita-nia luta tomak ne’e mak ita dehan frente da arte, frente da kultura, ohin ita fó sertifikadu ida para rejista buat sira ne’e atu fanun fali artista sira hotu, artista oi-oin atu bele hametin frente ida ne’e”, afirma.

Reprezentante família artista lejendáriu Maulohi, Januario Brites agredese ba entidade no autoridade timoroan sira nomós ALMAMOR tan esforsu hodi apoia prosesu tomak, hahú funerál to’o atribuisaun sertifikadu apresiasaun.

“Ita-boot sira-nia suporta ami sei la haluha, ami la sente katak buat hirak ne’e bele akontese mai ami tanba ami-nia maun Siku Maulohi naran koñesidu iha Timor laran tomak nomós rai viziñu sira ne’ebé timoroan hela ba”, apresia.

Brites hatutan família sente tebes peregrine, lala’ok no esperiénsia moris saudozu nian no la espera katak saudozu rai hela buat barak ba rai ida ne’e liuhusi múzika.

“Ami agradese ba mensajen primeiru-ministru, Marí Alkatiri ne’ebé hato’o hela ba ami família no oan ki’ak sira, iha momentu ne’ebá (11 novembru 2017) iha semitériu Bekuse hodi konsidera saudozo Siku Maulohi sai líder múziku istóriku no kultura nian”, agradese Januario Brites.

Hodi reforsa: “Ida ne’e ne’e nu’udar orgullu ida ami família no banda múzika, músisi no artista timoroan tomak, ami nia maun Sikitu sai hanesan ponte no odamatan ba artista timoroan hotu hodi hakat husi nia leten ho respeitu, direitu no liberdade”.

Jornalista: Rafy Belo

Editora: Rita Almeida

HUSIK IDA HATÁN