Prezidente Repúblika Felisita Jornalista Simu Karteira Profisionál

0
45
Xefe Kaza Sivíl Prezidénsia Repúblika, Francisco Vasconselhos, reprezenta Prezidente Repúblika atribui sertifikadu ba jornalista sira. Imajen Mídia Palásiu PR.

DILI, (TATOLI) – Prezidente Repúblika, Francisco Guterres Lú Olo, felisita no kumprimenta jornalista 200 resin ne’ebé simu Karteira Profisionál tuir kritériu ne’ebé estabelese hosi Konsellu Imprensa.

Xefe Estadu hato’o kestaun ne’e liuhusi Xefe Kaza Sivíl Prezidénsia Repúblika, Francisco Vasconselhos, bainhira partisipa iha seremónia atribuisaun Karteira Profisionál ne’ebé hala’o hosi Konsellu Imprensa iha Salaun Delta Nova, Komoro, kuarta, (20/12).

Prezidente Repúblika fiar katak jornalista sira ne’e iha kbi’it atu hamosu inisiativa oin-oin atu Timor-Leste bele haki’ak ba beibeik jornalista kredível. Katak, jornalista timoroan hatene hala’o sira-nia serbisu tuir prinsípiu étiku ba atividade jornalístika.

Jornalista sira lee termu juramentu molok simu Karteira Profisionál. Imajen Mídia Palásiu PR.

“Ita-nia luta libertasaun nasionál kesi mós ba lala’ok hosi jornalista timoroan no jornalista estranjeiru ho nasionalidade oin-oin. Jornalista estranjeiru balun mate ba rai ida ne’e no nune’ e sira kahur sira-nia raan ho timoroan sira-nia raan”, haktuir.

“Iha 1975, jornalista estranjeiru lima ne’ebé hetan tiru no mate iha balibo iha 1975; iha 1975, ita lakon mos jornalista timoroan no poeta di’ak tebes ida: Francisco Borja da Costa, balun seluk hetan baku no/ ka arriska sira-nia vida hodi hato’o informasaun kona-ba violasaun direitus umanus no ita-nia luta libertasaun nasionál iha 1991”, hatutan.

Atu fó onra ba jornalista sira hotu ne’ebé kontribui ba luta libertasaun nasionál no liberdade imprensa, Prezidente Repúblika husu atu Estadu Timor-Leste foti monumentu ida ba jornalista sira.

Konstituisaun RDTL garante direitu ba jornalista sira hato’o informasaun oinsá de’it liuhusi meiu komunikasaun tradisionál hanesan jornál, rádiu, televizaun no/ ka meiu modernu ka mídia sosiál. Nune’e, Prezidente Repúblika fiar katak jornalista sei haforsa-án nafatin atu hato’o informasaun ne’ebé kredível, tuir faktus no interpretasaun ida ne’ ebé sériu tuir kódigu étika jornalismu haruka.

Prezidente Repúblika mós husu jornalista sira atu kontinua halo kampaña ba prinsípiu no valór sira, ajuda eduka sosiedade atu hasa’e espíritu umanu, hasa’ e domin ba malu, hakiak kultura páz atu bele hala’ o dezenvolvimentu no halakon ki’ak.

Jornalista: Xisto Freitas

Editora: Rita Almeida

HUSIK IDA HATÁN