PR Husu Polítiku Sira Fó Liman Ba Malu iha Natal no Tinan Foun

0
125

DILI (TATOLI)—Prezidente Repúblika (PR), Francisco Guterres Lú Olo apela ba polítiku-na’in sira ne’ebé promete no simu kbiit hosi povu, atu fó liman ba malu haburas Timor-Leste no halakon ki’ak nune´e povu tomak bele moris di’ak liu-tan.

Xefe Estadu ko´alia asuntu ne´e liuhusi ninia mensajen ba Loron Natal (2017) no Tinan Foun (2018) iha Palásiu Prezidente Nicolau Lobato, Bairru Pité, Dili, Kinta horsehik.

Lú Olo dehan demokrasia fó dalan ba ema hotu atu hanoin oi-oin no hanoin oin seluk maibé hanoin ne´e tenke halibur ita no tenke forte liu duké hanoin ne´ebé haketak ita.

“Hamutuk ho prinsípiu no valores, ita sei forte liu no ita sei matenek liu. Ita sei buka dalan di´ak atu halakon ki´ak iha ita nia rai doben liuhusi hotu-hotu nia partisipasaun,” nia subliña.

Nia haktuir, enkuantu Jesus Kristu sei moris, tane ás valores no prinsípiu umanu, Jesus defende ema ki´ak sira no barani luta ba justisa . Tanba espíritu barani ne´e, lori Jesus Kristu hetan baku to´o mate iha Kruz.

Iha mundu tomak, tuir Prezidente Repúblika, kuadra festiva Natal no fim do ano ajuda malu hadi´a relasaun entre família no entre belun sira nomós família no belun sira fó ba malu prezente oi-oin nu´udar símblu hatudu sira nia domin ba malu.

Iha Timor, nia haklaken, timoroan barak laiha prezente atu fó ba malu tanba barak maka kbiit laek, maibé ita hotu-hotu iha rikusoin boot ida atu fó ba malu maka domin. Ho domin no respeitu ba malu maka sei timoroan sira sei hametin pás no estabilidade hodi haburas ba beibeik rai doben TL.

“Molok hakat ba tinan foun, ita ida-idak tenke halo reflesaun ba ita nia hahalok rasik durante tinan 2017. Ita tenke haree ba susesu ne´ebé maka ita halo ona no ita tenke hanoin hetan mós sala sira ne´ebé ita halo nu´udar sala ema ida-idak nian no nu´udar sala koletivu. Ita rekuñese sala atu aprende oinsá ita nakfilak ita nia sala ba susesu iha tinan oin mai,” Xefe Estadu afirma.

(Jornalista: Xisto Freitas)

(Editór : Manuel Pinto)

HUSIK IDA HATÁN