PPN Konsidera Diskusaun OR Prioridade Liu Asuntu Seluk

0
171
Prezidente Parlamentu Nasional, Aniceto Guterres. Foto Antonio Goncalves

DILI, (TATOLI) – Prezidente Parlamentu Nasionál (PPN), Aniceto Guterres, hateten seidauk bele ajenda rekerimentu sira husi bankada opozisaun sira tanba diskusaun ba Orsamentu Retifikativu (OR) prioridade liu asuntu seluk.

“Diskusaun Orsamentu Retifikativu mak sai prioridade boot liu husi asuntu seluk, hafoin asuntu ne’e hotu maka Parlamentu Nasionál sei halo debate ba mosaun sensura ba governu no seluk tan”, tenik PPN iha plenáriu, ohin.

Asuntu ne’ebé bankada opozisaun sira propoin atu inklui iha ajendandamentu husi loron 18 to’o 22 mak proposta destituisaun ba PPN, mosaun sensura ba governu no rekursu admisaun ba proposta lei OR.

Desde hahú, la introdus ona ajenda seluk maibé únika ajenda mak debate orsamentu.

Haktuir iha loron 1 dezembru simu proposta destituisaun PPN, tempu hanesan dokumentu ne’e espalla ona ba públiku. “Dokumentu ne’e espalla ona ba públiku iha loron ne’ebé ha’u simu no hamosu polémiku ba públiku ho alegasaun barak liu tan, tanba ne’e ha’u deside lori prosesu ba tribunál atu hetan protesaun ba direitu nu’udar sidadaun no atu hetan justisa ba akuzasaun no alegasaun ne’ebé ofende gratituita ha’u nia onra no reputasaun”, dehan.

Aniceto dehan tan sei la laiha ajendamentu ba proposta destituisaun PPN, enkuantu seidauk iha desizaun ruma husi tribunál ba pedidu ne’e.

Nune’e mós mosaun sensura ba governu seidauk bele ajenda, tanba seidauk iha konkordánsia kona-ba prazu ba governu atu mai hatan iha Parlamentu Nasionál (PN) no diskusaun mosaun sensura so bele akontese hafoin debate OR.

“Tuir prátika normál iha PN husi lejislatura dahuluk to’o ohin loron katak laiha atividade seluk nein ajendamentu ba asuntu seluk bainhira prosesu orsamentu retifikativu sei la’o hela no seidauk hetan aprovasaun finál”, afirma.

Kona-ba rekursu ba admisaun OR, Aniceto katak laiha fundamentu tanba la koloka razaun rekezitu formál rejimentu PN nian maibé rekerente sira aprezenta fali méritu no rekezitu apresiasaun substánsia OR no asesór jurídiku sira iha PN konfirma asuntu ne’e.

Iha parte seluk Vise Xefe bankada Kongresu Nasionál Rekonstrusaun Timor (CNRT-sigla portugés), Maria Terezinha, hateten bankada oposizaun aprezenta ona rekerimentu antes hahú reuniaun líder bankada, maibé molok hakotu reuniaun PPN la pronúnsia buat ida kona-ba rekerimentu hirak ne’e, tanba ne’e mak parte bankada opozisaun ezije fali iha plenária ohin.

Jornalista: Julia Chatarina

Editora: Rita Almeida

HUSIK IDA HATÁN