PNTL-F-FDTL Sei Fó Seguransa ba Natal no Tinan Foun

0
80
Komandante Jerál Polísia Nasionál Timor-Leste (PNTL), Komisáriu Júlio da Costa Hornay hatan jornalista sira hafoin enkontru ho Xefe Estadu iha Palásiu Prezidensiál Nicolau Lobato Bairo Pite, ohin. Foto Tatoli/Xisto Freitas

DILI (TATOLI)—Komandu Polisia Nasionál Timor-Leste (PNTL) no Forsa Defeza Timor-Leste (F-FDTL) halo ona koordenasaun atu antesipa seguransa iha tempu Natal No Tinan Foun.

“Ami sei halo servisu ho koordenadu entre instituisaun PNTL-F-FDTL atu bele asegura loron Natal no Tinan foun 2018, nune’e mós atu antesipa bainhira problema balun mosu iha relasaun ho situasaun polítika atuál,” Komandante Jerál PNTL, Julio da Costa Hornay ba jornalista sira hafoin enkontru Konsellu Superiór (KS) iha Komandu Jerál PNTL, Kaikoli, Segunda (11/12).

Nia dehan, PNTL no F-FDTL iha ona planu operasaun, aban (Tersa-red) sei hala’o konferénsia imprensa ba komandu rua ne’e atu hala’o servisu ho di’ak hanesan uluk halo seguransa ba eleisaun prezidensiál no parlamentár.

Enkuantu, situasaun jerál agora la’o kontroladú mezmu problema ki’ik oan ne’ebé akontese maibé PNTL mantein nafatin seguransa ba povu tomak no garante nafatin estabilidade nasionál iha munisípiu 12 inklui Rejiaun Autónomu Enklave Oe-Cuse Ambenu (RAEOA).

Entretantu Ministru Defeza no Seguransa apela iha enkontru Konsellu Superiór atu komandu PNTL hala’o servisu ho responsabilidade, neutralidade no imparsialidade.

Nune’e mós parte seguransa sira labele sadere an  ba partidu polítiku maibé mantein nafatin pozisaun hodi garantia estabilidade ba povu no nasaun.

“Ha’u nia prezensa iha enkontru Konsellu Superior (KS) atu halo abertura ba programa, Prezidente KS no membru sira informa kona-ba problema institusionál, ierarkia komandu no diskute mós kona-ba estratéjia PNTL inklui problema operasionál sira,” Ministru José Agostinho Somocho esplika.

(Jornalista : Zezito Silva)

(Editór : Manuel Pinto)

HUSIK IDA HATÁN