PFTL Plenária Anuál Daruak

0
90
Parlamentu Foinsa’e Timor-Leste (PFTL). Foto espesiál

DILI (TATOLI)-Parlamentu Foin sa’e Timor-Leste (PFTL) realiza plenária ba daruak, ohin, segunda (12/12), iha Palásiu Nobre-Lahane, Dili.

Sekretáriu Estadu Juventude no Traballu, Nívio Leite Magalhães informa katak governu konstitusionál da-hitu sei kontinua nafatin programa ida ne’e, ne’ebé inisia iha governu konstitusionál da-haat.

“Sei kontinua apoiu hodi implementa programa ida ne’e, ne’ebé fó benefísiu ba ita-nia juventude sira,” informa sekretáriu estadu Nívio Magalhães ba membru Parlamentu Foin sa’e sira, iha abertura plenária ne’e.

Juventude mak fini ba ukun na’in no futuru, futuru ba Timor-Leste, futuru governante. Bainhira ita ko’alia kona-ba futuru, presiza mós prepara futuru ida ne’ebé mak di’ak.

Futuru ne’ebé mai ho nia kualidade no futuru ne’ebé preparadu ba dezenvolvimentu nasionál.

“Liuhusi programa ida ne’e, la’ós deit asegura partisipasaun iha prosesu tomak dezenvolvimentu nasionál nia maibé prepara mós atu sai lider ne’ebé di’ak iha futuru,” akresenta sekretáriu estadu ne’e.

Nia reforsa, tanba ne’e, iha prosesu sira ne’e hotu, ne’e nu’udar prosesu aprendizajen ida ne’ebé sei dezenvolve kapasidade lideransa, koñesimentu kona-ba demokrasia no abilidade seluk tan.

“Ha’u husu atu ita hotu atu bele uza tempu ho di’ak. Durante plenária, tuir ho didi’ak bele aprende buat ruma husi prosesu sira ne’e hotu,” governante ne’e husu.

Nia hatutan, ita-nia nasaun presiza duni polítiku sira, maibé tenke polítiku ida ho fuan. Polítiku ne’ebé hanoin povu nia nesesidade, polítiku ne’ebé hatene katak iha atu defende interese povu, interese nasaun.

Parlamentu foinsa’e sira iha futuru, balun sei sai deputadu, sai membru governu ka serbisu iha fatin sira ne’ebé ligadu ho povu nia moris.

“Ohin hanesan inísiu ida. Inísiu aprendijazen, hodi hetan abilidade, hasa’e koñesimentu atu nune’e bele utiliza koñesimentu sira ne’e iha ita-nia moris loro-loron,” nia fó hanoin.

Hein katak buat sira ne’ebé mak membru Parlamentu Foinsa’e hetan liuhusi programa Parlamentu Foinsa’e labele de’it fó benfísia individualmnte maibé sei uza ba komunidade ba povu no nasaun ninian.

“Hato’o ha’u-nia apresiasaun ba komisaun organizadora ne’ebé mak organiza ona eventu ida ne’e no ba ema hotu ne’ebé envolve iha preparasaun to’o iha realizasaun. Parabéns ba membru Parlamentu Foinsa’e sira,” sekretáriu estadu Nívio Magalhães kongratula.

Sekretáriu Estadu Desportu no Alta Kompetisaun, formasaun no plenária, orsamentu ho montante setenta cinco mil, quarenta e sete e cinquenta centavo dolár.

Prezidente komisaun organizadora, alumni Parlamentu Foinsa’e, Zaulino Gomes da Silva informa katak atividade ida ne’e realiza tanba apoiu finanseiru husi Sekretáriu Estadu Desportu no Alta Kompetisaun ho orsamentu montante, dolár rihun hitu nolu resin lima, haat nolu resin hitu, sentavu lima nolu ka setenta cinco mil, quarenta e sete e cinquenta centavo dolár.

Orsamentu ida ne’e utiliza ba atividade preparativu plenária, alojamentu, formasaun no transporte ba membru Parlamentu Foinsa’e husi postu mai munisípiu no mai kapitál to’o fila fali nomós seluk tan.

Zaulino Gomes mós garante  no fiar katak sei ezekuta atividade ne’e ho di’ak, transparánsia no gastu fundu ne’ebé mak krédivel tuir prinsípiu kontabilidade ninian no prontu responsabiliza ba saida mak akontese iha sira-nia ezekusaun, liu-liu ba gastu finanseiru ninian.

“Problema ruma, ami prontu atu responsabiliza no hatan tuir normál legal sira ne’ebé mak vigora,” nia garante.

Plenária Parlamentu Foinsa’e sei hala’o durante loron lima, hahú ohin no sei remata iha sesta (15/12) ho aprovasaun rezolusaun finál.

Entretantu, Parlamentu Foinsa’e estabelese ho rezolusaun governu nú.23/ 2014, iha altura mandatu, sekretáriu estadu juventude no desportu, Miguel Manetelo.

(Jornalista: Rafy Belo)

(Editór : Manuel Pinto)

HUSIK IDA HATÁN