ONGV ‘Krize’ Ai moruk Antibiótika

0
53
Foto Espesial.

DILI (TATOLI) – Ospitál Nasionál Guido Valadares (ONGV) tuir Diretór Ezekutivu, Jose Antonio Gusmão, durante ne’e ‘Krize’ ai moruk hanesan antibiótika, ai moruk kura moras fuan, la iha nune’e médiku sira sempre haruka família pasiente ba sosa.

 “Ai moruk barak los atu presiza mak antibiótiku, ai moruk ema moras fuan no seluk tan maibé la iha ona, se kuandu la iha ita tenke haruka família ba sosa,” José Antonio Gusmão esplika ba Ajénsia Tatoli hafoin serimónia entrega mákina insineradór Bidau Santan, Kinta (28/12).

Ho kondisaun krize ne’ebé mak ONGV hasoru iha parte ai-moruk nu’udar jestór ba ONGV, José sente triste bainhira haree família ba sosa ai-moruk.

“Sé mak iha osan bele hola no sé mak la iha labele sosa entaun nia impaktu mak labele rekupera moras.”

“Pasiente mai mak dehan ai moruk la iha, ita labele haruka moras ba rai li’ur tanba daudaun ne’e osan la iha no tusan hirak ne’ebé halo iha rai li’ur ladauk selu.”

Haree ba realidade ne’ebé mak iha atu garante Artigu 57 konstituisaun repúblika demokrátiku Timor-Leste kona-bá  Saúde haktuir 1. Estadu hatene katak ema hotu iha direitu ba saúde, asisténsia médika sanitária, no mós devér atu defende no promove direitu ne’e. 2. Estadu hala’o no harii serbisu nasionál saúde universál ba ema hotu-hotu, tuir nia kbiit, gratuitu/la selu, tuir lei haruka. 3. Servisu saúde nasionál tenke iha fatin barak, labele hamutuk de’it iha fatin ida, atu ema hotu-hotu bele halo parte.

Ulun boot ONGV ne’e espera katak lider polítiku sira sei buka dalan hodi rezolve problema hirak ne’e iha nivel polítika.

Ospitál hanesan fatin ne’ebé hodi salva ema nia vida,  ema nia nesesidade ai moruk, nesesidade lojístika no seluk tan, maibé ne’e mós depende ba orsamentu. Ohin loron realidade hatudu orsamentu retifikativu rejeitadú iha Parlamentu Nasionál, impaktu ba ONGV impede planu ONGV enkuantu loroloron ba loron nesesidade sempre aumenta ba beibeik.

“Problema sira daudaun ospitál enfrenta, ai moruk falta no transferénsia moras ba rai li’ur, kanseladú,  maibé ha’u fiar katak tenke iha solusaun, sé la iha solusaun Ospitál sei labele halo buat ida.”

Aleinde falta ai moruk, ONGV mós ohin loron difisil atu halo kontratu ho tékniku hodi halo operasaun ba mákina modernu ne’ebé ONGV iha

“Nesesidade barak ne’ebé ospitál presiza maibé depende ba orsamentu,” José Antonio Gusmão hakotu lia.

(Jornalista : Zezito Silva)

(Editór : Manuel Pinto)

HUSIK IDA HATÁN