Nivio : TL Presiza Define Futuru Nasaun

0
239
Sekretáriu Estadu Juventude no Traballu (SEJT), Nívio Leite Magalhães.

DILI (TATOLI)—Sekretáriu Estadu Juventude no Traballu (SEJT), Nívio Leite Magalhães, bolu atensaun atu Timor-Leste presiza define uluk futuru nasaun nian iha kontestu juventude mak futuru nasaun nian.

“Dala barak ita rasik mós dehan juventude mak futuru nasaun nian, bainhira ita ko’alia kona-ba futuru nasaun, ita presiza mós define futuru nasaun ida oinsá, futuru nasaun hanoin atu baku malu de’it, tiru rama Ambon, oho ema  ka futuru ida ne’ebé bele halo buat ruma pozitivu ba rai ida ne’e no kontribui ba dezenvolvimentu,” Nívio Leite Magalhães hato’o iha salaun enkontru SEJT, Kaikoli, Ohin, iha ámbitu SEJT konvoka diálogu ho reprezentante joven husi suku 10 ne’ebé liga ba polítika no partisipasaun juventude atu rona saida mak joven sira hakarak atu hato’o.

Iha biban hanesan nu’udar governante ne’ebé sei tau matan ba juventude sira nia moris, Nivio deklara nia karater katak nia hanesan ema ida ne’ebé gosta rona barak duke ko’alia mak barak. Nia sei rona barak saida mak juventude sira hato’o

“Ha’u hakarak rona barak liu duké ko’alia barak,” Nivio haktuir.

Tuir nia SEJT nia area liga ba oinsá mak prepara juventude sira. Tanba ida ne’e, daudaun ne’e SEJT iha ona programa atu prepara joven sira ho di’ak liuhusi formasaun oioin liuhusi kontribuisaun ba pás, igualdade jéneru, formasaun karater joven nian, formasaun profisionál no seluk tan. Maibé atu implementa nia prefere rona uluk juventude sira nia hanoin.

Iha fatin hanesan reprezentante GIZ servisu kooperasaun husi Alemaña ba projetu no formasaun juventude, Stefan Hlavac, hatete importante mak rona no hatene ideia no interese joven sira.

“Jerasaun joven sira, agora tempu atu luta ba dezenvolvimentu uza estratéjia polítika nasionál iha Timór hanesan matadalan hodi hetan partisipasaun soseidade no munisípiu no komunidade no ha’u hakarak haree no rona husi ita (joven sira)”.

Iha diálogu ne’e joven sira hato’o saida mak durante sira sente liuliu ba postu traballu, edukasaun no saúde ne’ebé sai hanesan pilár importante ida husi polítika SEJT nian.

(Maria Auxiliadora)

(Editór : Manuel Pinto)

HUSIK IDA HATÁN