MKI Sei Halo Intervensaun Merkadu Liuhusi Bazár Baratu

0
11
Nesesidade Bázika sira. Foto/Google.

DILI, (TATOLI) – Ministériu Komérsiu no Indústria (MKI), tempu badak sei tun direta bá munisípiu hotu hodi halo intervensaun ba merkadu liuhusi programa bazár baratu.

Diretór Nasionál Regulasaun Komersiál, Domingos da Costa Soares, informa intervensaun merkadu ne’e atu fó atensaun maka’as ba ezijénsia sira ne’ebé komunidade hato’o relasiona ho folin ba nesesidade bázika hanesan foos ne’ebé sa’e iha munisípiu balun.

“Ida ne’e parte ida ne’ebé ministériu sei servisu hamutuk ho distributór sira hotu no sei realiza iha territóriu Timór laran tomak no sei responde ba ezijénsia sira iha tempu badak atu responde ba ita-nia kbiit-la’ek sira no komunidade ne’ebé ita dehan vulneravel liu, sira-nia forsa atu sosa natoon no ami sei lori sasán hirak ne’ebé sira presiza hodi hakbesik ba sira ho folin ida ne’ebé baratu tuir sira-nia kbiit. Ami sei estabelese tabela ne’ebé ho presu ki’ik liu”, Domingos dehan iha Bebora-Dili, ohin.

Sasán ne’ebé sei lori bá halo intervensaun merkadu mak hanesan foos, terigu, masin-midar, hemun, supermie, no buat sira ne’ebé sira presiza loroloron.

“Prosesu ida ne’e hanesan faze dahuluk. Programa ida ne’e ami haree ba situasaun la’ós atu hadau papél setór privadu nia, mas sei envolve setór privadu sira iha prosesu ida ne’e nia laran para sira mós bele ajuda iha parte ida ne’e atu alkansa ezijénsia sira ne’ebé hato’o husi komunidade”.

Tuir kalendáriu MKI sei tun iha fulan ida ne’e nia laran iha munisípiu 12 no enklave Oekusi. Programa ne’e sei lansa iha loron ida de’it tanba iha ekipa ne’ebé mak preparadu ona atu halo serbisu ida ne’e iha munisípiu sira.

Jornalista: Maria Auxiliadora

Editora: Rita Almeida

HUSIK IDA HATÁN