Membru Parlamentu Foinsa’e Nain Lima La Partisipa Plenária

0
194
Membru Parlamentu Foinsa’e sira. Foto: APFTL

DILI, (TATOLI) – Membru Parlamentu Foinsa’e na’in lima husi membru na’in 128 konfirmadu la partisipa iha plenária daruak parlamentu foinsa’e nian ne’ebé hala’o iha Palásiu Nobre-Lahane, ohin.

Prezidente Alumni Parlamentu Foinsa’e Timor-Leste, Zaulino Gomes da Silva, nu’udar mós komisaun organizadora ba jornalista sira hafoin abertura plenária daruak ho tema Joven Timor-Leste iha Abilidade Konsiénsia Demokrátika no Moris Hakmatek ne’e, katak tuir rezolusaun membru na’in 130, konfirmadu atu partisipa iha plenária na’in 128, maibé prezensa iha plenária ohin, na’in 125 de’it.

Razaun, membru na’in rua husi munisípiu Baukau tanba eskola no na’in ida husi Munisípiu Maun-fahe, Same iha Dili maibé problema família (inan mate). Enkuantu rua seluk tanba moras iha fatin alojamentu no posibilidade sei tuir hikas aban.

Zaulino mós esplika durante plenária halo diskusaun ba área temátika sira ligadu ho joven sira nian, tuir rezultadu identifikasaun problema no observasaun ne’ebé mak hala’o husi kada komisaun iha munisípiu ida-idak.

Komisaun hirak ne’e mak hanesan Komisaun A trata asuntu juventude ho edukasaun, komisaun B trata asuntu juventude ho moris saudável, komisaun C trata asuntu empregu no empregabilidade, komisaun D trata asuntu juventude no partisipasaun síviku no komisaun E trata asuntu juventude, violénsia no kríme.

“Sira halo tiha enkontru bankada iha munisípiu ida-idak, sira produz ona rezolusaun bankada ninian, bankada ida-idak sira sei mai entrega iha meza para depois meza plenária, abaisa ba komisaun sira”, informa.

Zaulino hatutan komisaun sira sei halo diskusaun, konsolida isu-temátika tuir informasaun ne’ebé sira identifika, liuhusi proposta komisaun ida-idak nian, komisaun ida-idak sei responsável ba debate no aprezenta iha plenária.

“Sira-nia enkontru sei hala’o durante loron rua, atu konsolida de’it isu-temátika ne’ebé mak komisaun iha no sei aprova proposta komisaun ida-idak ninian no komisaun ida-idak sei responsabiliza debate no aprezenta iha plenária iha dia 14 to’o 15”, haktuir.

Seluk, tuir ajenda, iha loron 12 no 13 sei realiza enkontru kada komisaun, reprezenta husi munisípiu ida-idak.

Entretantu, antes atu tuir plenária, iha loron lima liubá, semana kotuk membru sira husi munisípiu 12 inklui Rejiaun Administrativa Autonoma, Oecusse-Ambeno (RAAEOA) partisipa uluk iha formasaun jornalizmu báziku inkluindu abilidade moris, edukasaun sívika, meiu-ambiente no internet saudável.

Jornalista: Rafy Belo

Editora: Rita Almeida

HUSIK IDA HATÁN