MDS Somotxo Konvida Mariñeiru Xines Koko Kafé Timor

0
210

DILI (TATOLI)-Ministru Defeza no Seguransa, José Agostinho Siqueira “Somotxo” konvida autoridade no mariñeiru Xines sira, iha ró ahi ospitál, ARCA DA PAZ hodi koko no hemu kafé Timor, ne’ebé produz husi agrikultór kafé timoroan sira tanba iha sabór orijinál no naturál timoroan sira nian.

Foto espesiál

“Bainhira misaun umanitária hotu, ita ba hemu kafé Timor nian iha otel Timor ka iha Plaza hodi sente sabór kafé Timor nian,” hateten ministru defeza José Agostinho ba autoridade no mariñeiru ARCA DA PAZ iha sorumutu ofisiál, iha Porto, Díli, kinta (14/12).

Konvite verbál ida ne’e nia hato’o ba autoridade marítima xines sira ne’e tanba sira mós hakarak koko sabór kafé Timor nian.

“Xina ami iha xá, agora iha Timor, ami hakarak mós hemu kafé Timor,” dehan Komandante ró ahi ospitál ARCA DA PAZ, Gun Bailin.

Entretantu, iha enkontru ofisiál ne’e akompañadu husi Major Jenerál FALINTIL-FDTL (Forsa Defeza Timor-Leste), Lere Anan Timur, Xefe Estadu Maior Falur Rate Laek no Komisáriu PNTL (Polísia Nasionál Timor-Leste), Júlio da Costa Hornay nomós embaixadór Xina iha Timor-Leste Liu Hunyan no seluk tan.

Husi autoridade mariña Xina nian reprezenta husi Komandante ró ahi ospitál ARCA DA PAZ, Gun Bailin, Komisáriu Polítika Jin Yi, ofisiál komandu Guo Baofen no sira seluk tan.

Hafoin enkontru, autoridade xines oferese xá herbal ba autoridade timoroan sira inklui entrega mós rekordasaun hanesan sapeu mariña Xina nian ba autoridade timoroan sira ne’e.

(Jornalista: Rafy Belo)

(Editór : Manuel Pinto)

HUSIK IDA HATÁN