Mariña Xina Tulun Asisténsia Médika ba Timor-Leste

0
123

DILI (TATOLI)-Ró Ospitál Mariña, Repúblika Populár Xina, ho naran ARCA DA PAZ sei vizita Timor-Leste (TL) hodi fó asisténsia médika ba populasaun, veteranu, Polísia Nasionál Timor-Leste (PNTL), Falintil-Forsa Defeza Timor-Leste (F-FDTL), família no seluk tan, husi loron 14 to´o 21 dezembru 2017.

“Ró ospitál ne´e sei mai ho médiku ka doutór espesialista ba moras oi-oin,” ministru defeza no seguransa, José Agostinho Siqueira “Somotxo” anunsia liuhusi karta avizu,  Ministériu Defeza no seguransa ho nú. ref: 119/GabMDS/XII/2017, redasaun Ajénsia TATOLI asesu, kuarta (06/12) loro-kra´ik.

Médiku espesialista moras li´ur no laran mak hanesan iha, surgery, clinical medicines, traditional chinese medicine, acupuntura and moxibution, medical imaging diagnosis, stomatology medicine, dermatology, medical examination no seluk tan no ho ai-moruk nomós ekipamentu oi-oin.

Ró Ospitál Mariña, Repúblika Populár Xina, ho naran ARCA DA PAZ ne´e iha sala operasaun walu (rua ba operasaun kuidadu intensivu no neen ba operasaun jerál).

“Médiku ho ró lubuk ida hamutuk ho ita-nia médiku sira husi Hospital Nasionál Guido Valadares, F-FDTL no PNTL sei fó konsulta ba ema hotu ne´ebé mak hakarak halo konsulta ba saúde durante loron hirak nia ne´e nia laran,” refere karta avizu ne´e.

Ajenda ka programa ba konsulta hanesan:

  • Kinta, 14 dezembru 2017;

Tuku 14:30 (loro-kra´ik), hahú tratamentu ba veteranu sira (liu-liu sirurjia/operasaun hasai kilat-musan ka estillasu iha isin, másimu ema na´in 30) ne´ebé ezamina, selesiona no rekomenda husi HNGV (Hospitál Nasionál Guido Valadares).

Tanba ne´e, ba veteranu sira ne´ebé hakarak hasai kilat-musan ka estillasu diriji uluk ba HNGV, divizaun asuntu veteranu hodi halo ona rejistu. Rejistu hahú loron 11, 12 no 13.

  • Sesta, 15 dezembru 2017;

Konsulta ba populasaun. Dader tuku 08:00 to´o tuku 11:00 no loro-kraik tuku 14:00-17:00, iha Portu Díli.

Kontinua tratamentu ba veteranu sira ne´ebé rekomenda husi HNGV (sirurjia/operasaun hasai kilat-musan ka estillasu), hahú tuku 09:00 dader, iha Portu Díli.

  • Sábadu, 16 dezembru 2017;

Konsulta ba populasaun. Dader tuku 08:00 to´o tuku 11:00 no loro-kraik tuku 14:00-17:00, iha Portu Díli.

Sei halo mós konsulta ba populasaun iha Ataúro (sei uza elikoptéru tula médiku, ekipamentu no ai-moruk). Hahú tuku 08:00 to´o tuku 11:00 no loro-kraik tuku 14:00-17:00, iha Ataúro.

  • Domingu, 17 dezembru 2017;

Konsulta ba populasaun. Dader tuku 08:00 to´o tuku 11:00 no loro-kraik tuku 14:00-17:00, iha Portu Díli.

Sei halo mós konsulta iha embaixada Xina iha Díli, liu-liu ba populasaun sira besik embaixada hanesan Kampu Alor no Ai-tarak laran. Hahú tuku 08:00 to´o tuku 11:00 no loro-kraik tuku 14:00-17:00, iha embaixada Xina.

Sei halo konsulta ba populasaun iha Ataúro. Hahú tuku 08:00 to´o tuku 11:00 no loro-kraik tuku 14:00-17:00, maibé sei konfirma loos iha, 16 dezembru.

  • Segunda, 18 dezembru 2017;

Konsulta ba populasaun. Dader tuku 08:00 to´o tuku 11:00 no loro-kraik tuku 14:00-17:00, iha Portu Díli.

Sei halo mós konsulta ba militár F-FDTL ho família no PNTL. Hahú tuku 08:00 to´o tuku 11:00 no loro-kraik tuku 14:00-17:00, iha Ministériu Defeza no Kuartel Jenerál F-FDTL, Fatuhada, Díli.

  • Tersa, 19 dezembru 2017;

Konsulta ba populasaun sei halo iha dader de´it. Hahú tuku 08:00 to´o tuku 11:00, iha Portu Díli.

Konsulta ba F-FDTL no PNTL. Hahú tuku 14:00 to´o tuku 17:00.

  • Kuarta, 20 dezembru 2017;

Konsulta ba F-FDTL no PNTL sei halo iha dader de´it. Hahú tuku 08:00 to´o tuku 11:00, iha fatin hanesan.

Entretantu, prezensa ró ospitál husi Repúblika Populár Xina mai Timor-Leste, ho naran ARCA DA PAZ ne´e, tanba konvite husi Timor-Leste hodi realiza misaun umanitária. Nune´e, bele hametin liutan relasaun entre instituisaun defeza no povu nasaun rua nian, Timor-Leste no Xina.

Vizita ró ospitál militár ARCA DA PAZ ne´e nu´udar vizita dahuluk mai iha Timor-Leste.

(Jornalista: Rafy Belo)

(Editór : Manuel Pinto)

HUSIK IDA HATÁN