Manuál Tezouru Matadalan ba JFP

0
117
Ilustrasaun

DÍLI, (TATOLI)-Ministériu Planu no Finansa (MPF) sosializa manuál tezouru ba ajente estadu no autonoma ne’ebé jere no envolve iha ezekusaun Orsamentu Jerál Estadu (OJE), iha sala auditóriu MPF, Ai-tarak laran, Díli, Tersa (12/12).

“Atu fahe informasaun kona-ba guia ka implementasaun manuál tezouru  ba iha jestaun finansa públika. Nune’e mós atu bele garante kualidade nomós prosesu hotu ne’ebé fó efetivu no kualidade,” Diretora Jerál Pagamentu MPF, Regina de Sousa de Jesus.

Importánsia husi tezouru ne’e hanesan matadalan ba Jestaun Finansa Públika (JFP) iha Timor-Leste hodi asegura ezekuzasaun OJE ida ne’ebé efetivu no kualidade liutan.

Atu hatan ba rekizitu husi parte interesadu sira ne’ebé envolve iha ámbitu JFP, espesifikamente iha operasaun tezouru.

Operasaun tezouru hanesan funsionáriu tezouru, finansa Ajénsia Autonoma, MPF, finansa liña ministeriál iha nível nasionál nomós munisipál no funsionáriu diplomátiku Timor-Leste sira.

Inklui, banku komersiál ne’ebé envolve iha rekolla reseita no despeza governu iha Timor-Leste, banku sentrál Timor-Leste, parseiru bilaterál, multilaterál no ajénsia doadór sira nomós ajénsia internasionál hanesan FMI, Banku Dezenvolvimentu Aziátiku no seluk tan.

Diretora Regina de Sousa de Jesus akresenta, manuál tezouru ne’e MPF halo ezersísiu tinan barak nia laran depois mak kumpleta hodi bele implementa husi parte hotu ne’ebé mak envolve iha ezekusaun orsamentu.

Nia esplika mós katak ho implementasaun manuál tezouru ne’e bainhira implementa ho efetivu sei fó benefísiu ba ajente sira hodi kumprende prosedimentu saida mak presiza atu hodi ezekuta orsamentu jerál estadu nian no garante katak sei transparante tebes.

“Manuál tezouru ne’e transparante tebes ba ema hotu,” salienta Diretora Jerál Pagamentu, Regina de Sousa de Jesus.

Nune’e mós, tuir nia, manuál tezouru sei garante kualidade ezekusaun OJE.“Ha’u sente ida ne’e hanesan ajuda tebes ami hotu ne’ebé mak envolve iha JFP nian, bele hanesan matadalan hodi bele kumpleta ami,” diretora ne’e konklui.

Entretantu matadalan tezouru ne’e kompostu husi kapítilu 12 hanesan, kapitílu I kona-ba manuál tezouru, kapítulu II kona-ba vizaun jerál sistema tezouru, kapítulu III kona-ba planu kontas, kapítulu IV kona-ba fundu konsolidadu no fundu públiku seluk, kapítulu V kona-ba akordu bankáriu no kapítulu VI kona-ba ezekusaun orsamentu.

Tuir mai, kapítulu VII kona-ba prosesu pagamentu payroll, kapítulu VIII kona-ba prosesu surat pagamentu, kapítilu IX kona-ba adiantamentu-petty cash, fundu adiantamentu no adiantamentu ba embaixada, kapítulu X kona-ba rekolla no kontabiliza reseita, kapítulu XI kona-ba jestaun kaixa no dívida no kapítulu XII kona-ba ajénsia autonoma & munisípiu sira-nia ezekusaun orsamentu.

 (Jornalista: Rafy Belo)

(Editór : Manuel Pinto)

HUSIK IDA HATÁN