Lisensiamentu Sektorál Sei Implementa Inisiu 2018

0
57
Foto/Google.

DILI, (TATOLI) – Diretór Servisu no Verifikasaun Emprezariál (SERVE), Florêncio Sanches, informa dekretu lei 34/2017 ne’ebé regula kona-ba lisensiamentu sektorál hodi revoga fali dekretu lei 24/2011 sobre lisensiamentu komersiál ne’ebé kria husi Governu dahituk Konstitusionál sei implementa iha loron 25 Janeiru 2018.

Lei 34/2017 ne’e foin promulga no publika iha Jornál Repúblika iha setembru 2017 ne’ebé fó kompeténsia ba SERVE atu implementa iha fulan oin.

“Maibé kompeténsia ba Ministériu Komérsiu no Indústria (MKI) nafatin katak utiliza nia kompeténsia tomak atu halo fiskalizasaun, vistoria (inspesaun) no buat ne’ebé iha, maibé lisensiamentu sei mai husi SERVE no sei relata bá Ministériu Komérsiu no Indústria atu utiliza sira-nia kompeténsia tuir kompañia sira ne’ebé ami fó ona lisensa hodi regula tuir”,  Florêncio hatete iha Matadouru, kinta, (14/12).

Hatutan tan: “Ida ne’e polítika Governu nian ne’ebé mai hamutuk ho parseiru internasionál Banku Mundiál, katak lala’ok ida ne’e mak implementa ho susesu iha nasaun ki’ik sira. Sé Timor-Leste mak hakarak tuir ida ne’e entaun dezenvolvimentu ekonómiku sai di’ak liután, tanba ne’e sai tiha lei ida”.

Nune’e iha loron 25 janeiru, ema ne’ebé bá rejista, SERVE fó kedan lisensa no tuir lei hafoin lisensa ne’e sai sei relata kedan ba ministériu relevante liuliu MKI hodi halo fiskalizasaun no vistoria. “Ida ne’e mak ita bolu balkaun úniku iha dezenvovimentu ekonómiku husi empreza sira”.

Antes ne’e MKI mós fó lisensa ba empreza sira nomós SERVE maibé ho implementa lisensamentu sektorál ne’e sei la akontese ona.

“Uluk, tebes duni ministériu A no B hasai ninian mas ida ne’e la’e. Antes ne’e FEE ne’ebé selu ba lisensiamentu komersiál aas tebes no ha’u sei kua to’o porsentu 60 ho razaun mak baze dadus ne’ebé iha hatudu porsentu 60 negósiu ne’ebé iha ki’ik, kuandu aplika FEE boot ba sira, kompañia boot lasente maibé ki’ik sente tebes tanba kompañia boot iha Timór uitoan de’it maibé ki’ik mak barak”.

Bainhira ki’ik mak barak no selu hanesan ho kompañia boot entaun labele, maibé janeiru mak sei aplika FEE ne’ebé sira selu durante ne’e kolleta husi MKI ho dólar 105 ba kada lisensa, SERVE mak sei koleta fali hodi hatún nia folin porsentu 60.

“Janeiru kuandu aplika tur lei ne’e (lisensiamentu sektorál) sei kobre de’it dólar 40 tanba númeru boot iha Timór mak empreza ki’ik sira entaun hatún, sé ki’ik barak mak selu boot nafatin entaun ladi’ak. Ida fali mak rejista gratuita nafatin, autorizasaun gratuita só lisensa komersiál mak selu ho legaliza buat ida mak selu séntimu 10”.

Dezde ukun-án Timor-Leste koñese mak lisensiamentu komersiál, maibé ida ne’e demora tempu to’o fulan no emprezáriu sira sente kleur liu atu ezerse sira-nia atividade. Nune’e Governu haree polítika ne’e ladi’ak no mosu ideia ida atu iha lisensiamentu sektorál katak atividade ne’ebé la merese atu hetan lisensa lalika fó no empreza sira lalika hein, depois rejistu hetan autorizasaun husi SERVE bele halo ona nia atividade.

“Lisensa sektorál mak fó ba sira ne’ebé halo atividade maibé iha risku aas, ezemplu sira fa’an mina risku aas tebes entaun tenke hetan lai lisensa sektorál, la’ós ona komersiál maibé SERVE sei rejista no hasai lisensa komersiál ba sira atu utiliza lisensa ida ne’e hodi hetan lisensa sektorál husi ministériu relevante”.

Jornalista: Maria Auxiliadora

Editora: Rita Almeida

HUSIK IDA HATÁN