Lere Kontinua Husu Joven no Nai Ulun Sira Atu Hakmatek

0
167
Majór Jenerál FALINTIL-Forsa Defeza Timor-Leste (F-FDTL), Lere Anan Timur akompaña hosi Komandante Jerál, Polísia Nasionál Timor-Leste (PNTL), Komisáriu Júlio da Costa Hornay, sesta, (20/10) loraik ne'e hafoin hasoru Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairo Pité, husu ba ema hotu atu kontribui ba estabilidade. Foto dokumentasaun Tatoli/Xisto Freitas

DILI, (TATOLI) – Xefe Estadu Majór FALINTIL-Forsa Defeza Timor-Leste (F-FDTL), Maior Jenerál Lere Anan Timur, kontinua husu ba joven no nai-ulun sira atu hakmatek hodi lori Nasaun ne’e ba oin nune’e povu bele moris hakmatek iha nia rain rasik.

“Kuandu ita iha problema ita mak tenke rezolve rasik no lalika konvida ema seluk atu mai rezolve ita nia problema, tanba funu tinan 24 nia laran timoroan mesak mak halo funu no la’os apoiu ema seluk”, apela Lere Anan Timur liuhosi konferénsia imprensa hamutuk ho komandu jerál PNTL iha Kuartél Jerál Kaikoli, Tersa (12/12).

Husu ba povu tomak atu iha maturidade, matenek no responsabilidade ba vida Nasaun, mezmu ita nasaun kiik maibé iha nivél nasaun boot sira, ita nivél hanesan, afirma Lere.

Instituisaun Polísia Nasionál Timor-Leste (PNTL) ho F-FDTL lakohi atu iha tan krize hanesan 2006, situasaun uluk sai hanesan lisaun boot ba ita, entaun nu’udar Timoroan ita mak rezolve ita nia problema.

Apelu ne’e relasiona ho informasaun ne’ebé parte defeza no seguransa rekolla katak diskunfia kilat ilegál balun komesa tama ona iha rai-laran.

“Ami iha ona informasaun katak ema balun iha kilat, seidauk konfirmadu maibé naran balun ema temi maibé ami labele duun ema enkuantu ami ladauk iha evidénsia forte”, hatete Lere liuhosi konferénsia imprensa.

Ulun boot forsa ne’e hatutan informasaun ne’ebé hetan katak kilat balun mai hosi Atambua (Timor Osidentál), kilat hirak ne’e iha sé nia liman ladauk hateten.

“Ha’u labele temi ema nia naran, tanba horsida ema haruka hatudu evidénsia iha ne’ebé, maibé iha ona informasaun ne’ebé ami hetan”, katak tan.

Tuir Lere, ohin loron segredu laiha, ida ne’ebé mak tuir lei ita bele uza no ida ne’ebé la tuir lei ita labele uza, tanba ne’e konsidera krime.

“Ha’u la tiru ema barak hanesan ema seluk, tanba atu buti mós ita nia liman sei tos, tanba ne’e sé mak rai kilat, di’ak liu soe ba tasi”, sujere.

Akresenta, kilat balun iha rai-laran ho ilegál, maibé neneik nia nain sei soe ba tasi eh mai entrega direta ba seguransa sira.

Hatutan, ema ne’ebé rai kilar iha nia liman só hakarak komete krime. “Maibé ha’u la fiar katak nia atu halo buat ruma, tanba ne’e tenke hadook-án hosi krime hanesan oho malu no seluk tan”.

Jornalista: Zezito Silva

Editora: Rita Almeida

 

HUSIK IDA HATÁN