Lautein no Golden Star Sai Vensedór Iha Feira Gastronomia Sabor Timorense

0
55
Foto/MT.

DILI, (TATOLI) – Munisípiu Lautein no restaurante Golden Star sai vensedór dahuluk iha feira gastronomia sabor timorense ne’ebé organiza husi Ministériu Turizmu (MT), ne’ebé partisipa husi munisípiu 12, inklui Rejiaun Espesiál Oekusi hodi promove ai-han tradisionál nian.

Iha demostrasaun ba produtu lokál ne’e, avaliasaun rua ne’ebé ekipa juri fó mak ba munisípiu no restaurante nasionál iha Dili. Husi munisípiu, Lautein sai manán na’in dahuluk, Manatutu iha segundu lugar, Oekusi iha datoluk, tuirmai Vikeke, Likisá no Kovalima iha sestu lugar

Prezidente ekipa juri ne’ebé hala’o avaliasaun ba sabór produtu lokál, Cesar da Costa, hatete kritéria haat ne’ebé fó husi komisaun organizadora mak ospitalidade, kreatividade, aprezentasaun sobre hahán no dekorasaun meza no atributu ne’ebé uza.

“Husi nasionál (restaurante sira) ne’ebé manán iha segundu lugar mak Agora Food Studio, terseiru husi Bebmequer no primieru monu ba iha Golden Star”, Cesar aviza iha Sentru Konvensaun Dili, kinta, (14/12).

Diretora Nasionál Empreendimentu Atividade no Produtu Turístiku, Maria Ernestina Lopes, hatete eventu ne’e atu promove ai-han lokál ho sabor Timór nian no sai produtu atrativu ba iha nivel nasionál no internasionál.

“Sabor timorense ne’e foka liuliu kona-ba ai-han Natál nian, ai-han espesiál kada restaurante husi hahán entrada to’o sobre meza. Totál restaurante ne’ebé partisipa husi nasionál to’o munisípiu 12 hamutuk 50”.

Vise-Ministru Turizmu, Rui Menezes, dehan kompetisaun sabor timorense ne’e parte ida husi polítika MT iha Governu dahituk Konstitusionál.

“Liuliu polítika ne’ebé hanaran dezenvolvimentu turizmu baze komunitária nian. Oinsá mak bele dezenvolve turizmu katak nia efeitu ne’e halai liubá inan-aman sira, ba uma-kain ida-ida hafoin sa’e mai leten ho hanoin polítika ne’e mak ita hodi motiva hodi halo feira ida ne’e. Kada tinan ita sei esforsu aan atu halo ho polítika ida oinsá eleva ita-nia sabor timorense bele komersializa no globaliza”.

Ministru Turizmu, Manuel Vong, dehan hahán ne’ebé prodús no tein iha rai ida ne’e refleta identidade Timór no iha ligasaun ho nia orijinalidade hahán ne’e mai husi ne’ebé.

“Sé ita han karik hahán ne’e nia reseita mai husi Portugál ka Xina, husi Indía ka Indonézia nia orijen mak hahán maibé sabor timorense. Sé nia orijinalidade husi Mantutu ninian sukaer ho raba-raba karik nia orijen husi Manatutu. Sé karik hahán ne’e saboko ruma ho akompañamentu tua-mutin ida entaun ita bele dehan kuaze parte kosteira hotu-hotu halo ida ne’e, tanba ne’e ita hotu hamutuk iha ne’e atu define ou redefine, kualifika ita-nia produtu gastronomia ba nia orijen”.

Manán na’in iha kompetisaun husi restaurante nasionál hahú primeiru lugar, prémiu osan ne’ebé simu U$1000, segundu 900 no terseiru 800.

Husi munisípiu, manán na’in dahuluk hetan 700, daruak 600 no datouk 500.

Jornalista: Maria Auxiliadora

Editora: Rita Almeida

HUSIK IDA HATÁN