Kuda Ai-oan Fó Omenajen Ba Saudozu Nicolau Lobato

0
71
Prezidente Repúblika, Francisco Guterres Lú Olo kuda ai-kasi iha Jardin Eroi Metinaro. Imajen Ajénsia TATOLI/Xisto Freitas.

METINARO (TATOLI)—Prezidénsia Repúblika hamutuk ho Governu liuhusi Ministériu Solidariedade Sosiál (MSS) no Komisaun Omenajen hala’o atividade kuda ai-kasi iha Jardin Eroi Metinaro ho objetivu fó omenajen ba Saudozu Prezidente Nicolau dos Reis Lobato ne’ebé mate iha kombate iha 31 Dezembru 1979.

“Ohin ita mai kuda ai-oan iha Jardin Eroi Metinaro halo memória ba Saudozu Nicolau dos Reis Lobato ne’ebé maka mate iha 31 Dezembru. Kuandu ita fó memória ba saudozu Nicolau Lobato, hakarak mós fó memória ba saudozu sira seluk nia restus mortais iha fatin ida ne’e,” Prezidente Repúblika, Francisco Guterres Lú Olo dehan liuhusi ninia deskursu molok kuda ai-oan iha Jardin Eroi Metinaro, Dili, kinta dadér ohin.

Nia esplika katak ai-oan sira ne’e reprezenta simboliza saudozu sira hotu nia hanoin no hakarak ba rai ida ne’e nia di’ak no aban bainrua bele buras hanesan sira nia hanoin ne’ebé husik hela mai timoroan sira seluk atu kontinua haburas Timor-Leste.

Xefe Estadu husu ba jerasaun foun sira atu rai nafatin saudozu sira nia memória tanba nu’udar ezemplu dedikasaun, korajen, abnegasaun, espíritu sakrifísiu boot teb-tebes ba nasaun no povu.

“Nicolau Lobato la’ós ema baibain maibé nia hatún nia án hanesan ema povu nia oan, hanesan mós ema ki’ik ida atu defende nia maluk sira seluk ne’ebé laiha kbiit, ne’ebé hetan subjugasaun hosi kolonializmu,” Lú Olo haktuir.

Ai-oan liu atus ida (100) maka Prezidente Repúblika kuda hamutuk Xefe Kaza Sivíl no Militár Palásiu Prezidénsia Repúblika, funsionáriu Palásiu Prezidénsia Repúblika, funsionáriu MSS no veteranu sira. Atividade kuda ai-oan hala’o iha tuku 09:30 no ramata iha tuku 10:00.

(Jornalista: Xisto Freitas)

(Editór : Manuel Pinto)

HUSIK IDA HATÁN