Konstituisaun La’ós Ko’alia De’it Formasaun Governu

0
107
Reprejentante Organizasaun Naun Govermentál sira ne'ebé halo diálogu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR

DILI, (TATOLI) – Sosiedade sívil sira husu ba jerasaun primeira atu labele husik hela presendente ne’ebé laduun di’ak ba jerasaun foun, tanba ne’e dalan atu rezolve problema la’ós hamonu governu maibé komunika malu nafatin.

Peskizadór La’o Hamutuk, Juvinal Dias, hateten konstituisaun Repúblika Demokrátika Timor-Leste (RDTL) elabora husi membru Asembleia Konstituiante na’in 88 la’ós ko’alia de’it formasaun governu maibé asuntu seluk hanesan povu nia direitu.

Pursentu 99 populasaun koko la’o ba oin, depende ba edukasaun, saúde, agrikultura, ba servisu públiku. Pursentu ida  de’it mak preokupa kona-ba konstituisaun.

“Tuir ami-nia ponto de vista konstituisaun la’ós ko’alia kona-ba forma governu de’it. Konstituisaun la’ós ko’alia kona-ba artigu 106, 108 ka 100 de’it maibé ko’alia mós kona-ba obrigasaun Estadu nian, ko’alia kona-ba direitu povu nian”, katak peskizadór Organizasaun Naun Govermentál Lao Hamutuk bainhira partisipa dialógu ho Prezidente Repúblika iha Palásiu Prezidente Bairo Pité, ohin.

Hatutan tan: “Husi ami-nia ponto de vista simples katak ita hahú hela ho interese no vingansa polítika, ami haree hanesan presendente ne’ebé laduun furak ba jerasaun foun”.

Peskizadór ne’e dehan governu agora ne’e minoria, tuir konstituisan frájil atu bele monu, maibé tuir sira-nia opiniaun se karik 35 ne’e fó governu mós bele monu nafatin de’it mezmu sira-nia programa bele pasa, Orsamentu Jerál Estadu (OJE) bele pasa iha Parlamentu maibé bainhira Prezidente Repúblika veta dala ida de’it sira-nia orsamentu Estadu, susar hetan 2/3 membru parlamentu atu bele asegura governu.

“Tanba ne’e tuir ami-nia ponto de vista ida agora ukun mós frájil, atu ba mós frájil hotu, entaun hanesan de’it”, nia fó razaun.

Orientasaun ba polítika dalaruma haluha buat fundamentál sira. “Tanba ne’e ami hanoin, konsensu polítiku tenke la’o nafatin entre partidu polítiku sira, diálogu tenke la’o nafatin, nune’e labele iha presedente kona-ba vingansa polítika”.

Iha fatin hanesan, diretór Asosiasaun HAK, Manuel Monteiro, ho esperansa ba Xefe Estadu atu uza poder konstitusionál atu tetu, la fó efeitu boot ba povu.

Nune’e mós diretór Manuel Monteiro, sujere jerasaun ida agora atu husik hela dalan moos ba jerasaun tuir mai atu labele sidi iha loron ikus. “Ne’e hanesan lian ki’ik ida husi sosiedade ida”, katak Manuel Monteiro.

Hatan ba preokupasaun sira ne’e, Prezidente Repúblika sei sukat antes hola desizaun. “Ha’u prevé ba to’o iha ne’ebá i konsekuénsia sira hotu, tanba ne’e mak ha’u sempre hola inisiativa atu líder sira bele hetan intendimentu ida”, tenik Xefe Estadu.

“Dezafiu boot liu agora mak ita-nia kapasidade dezenvolve ita-nia rain hodi atende povu nia nesesidade. Tinan 15 nia laran kabe ba ita hotu, liu-liu ba ami jerasaun tuan, ami tenke hatene hasai sinteze kona-ba esperiénsia kona-ba demokrasia, kona-ba ukun ninian, servi povu ninian hanesan povu mak na’in ba ukun”, realsa.

Jornalista: Rafy Belo

Editora: Rita Almeida

HUSIK IDA HATÁN