Komunidade Akadémiku Husu PR Solusiona Problema ho Prudente

0
113
Estrutura Komunidade Akadémiku UNTL hasai foto hamutuk ho PR Lú Olo. Imajen Mídia Palásiu PR.

DILI, (TATOLI) – Komunidade Akadémiku hosi Universidade Nasionál Timor Lorosa’e (UNTL) hato’o sira nia rekomendasaun ba Prezidente Repúblika (PR), Francisco Guterres Lú Olo, atu responde situasaun polítika iha rai laran.

Hanoin sira ne’e hato’o bainhira hasoru Xefe Estadu iha Palásiu Prezidente Nicolau Lobato Bairru Pité, lorokraik ne’e.

Reitór UNTL, Francisco Miguel Martins, maka lidera no hato’o sira nia opiniaun ne’ebé la haliis ba grupu ka partidu ruma.

Sira fó votu konfiansa tomak ba Prezidente Repúblika nu’udar Komandante Supremu FALINTIL-Forsa Defeza Timor-Leste (F-FDTL) atu uza kompeténsia prerogativu ho hanoin krítiku no prudente hodi kaer ba Konstituisaun RDTL ho rigór nu’udar baze fundamentál hodi fó solusaun ba problema hotu ne’ebé akontese iha nasaun ne’e hodi garante unidade no estabilidade nasionál.

Rekomenda atu Prezidente Repúblika rona líder nasionál sira, liu-liu líder istóriku sira ne’ebé ho hanoin di’ak atu konstrui nasaun ida ne’e iha pás, armonia no demokrasia hodi hametin unidade no estabilidade nasionál.

Husu mós atu kria diálogu prezidensiál ho líder istóriku ho espíritu demokrátiku, nasionalizmu, unidade no onestidade hodi solusiona problema iha rai laran no provene infiltrasaun interna ba interese rai liur nian ba Devide Et Impera.

Husu atu muda diverjénsia ideia, hodi hetan solusaun ida ne’ebé ekilibriu no justu tuir Konstituisaun haruka.

Husu Xefe Estadu atu kontinua kaer metin nia deklarasaun iha sorumutu ho komunidade Suai iha ámbitu komemorasaun Proklamarasaun Independénsia 28 Novembru liu-ba katak sei hola desizaun ida ne´ebé sei la hasusar povu, desizaun ida ne’ebé kontinua garante pás, estabilidade nomós minimiza konsekuénsia momentum ba ekonomia, seguransa, edukasaun, pás no estabilidade.

Husu atu garante no kaer metin relasaun di’ak entre instituisaun F-FDTL no PNTL atu bele sai forsa ida ne’ebé imparsiál ba povu hodi hametin lutu ameasa interna no externa.

“Ne’e kria kondisaun tranzitóriu ne’ebé di’ak atu tránzita estafeta lideransa demokrátiku ne’ebé nakonu ho espíritu nasionalizmu, patriotizmu hosi jerasaun tuan ba jerasaun foun hodi kaer metin prinsípiu aswa’in sira nian”, dehan.

Biban ne’e, Prezidente Repúblika hateten pontu rua maka fundamentál liu atu aplika maka diálogu ho líder istóriku sira no hola desizaun tuir Konstituisaun atu labele afeta ba povu nia moris.

Jornalista: Xisto Freitas

Editora: Rita Almeida

HUSIK IDA HATÁN