KM Aprova Rejimentu KM no ‘Preokupa’ Karta Destituisaun

0
433
Enkontru Konsellu Ministru, ohin. Foto GPM

DILI (TATOLI) – Governu liuhosi reuniaun Konsellu Ministru (KM), ohin, Kuarta (6/12) aprova ona rejimentu interna KM nian, diskute mós programa governu hodi aprezenta ba Parlamentu, inklui  ko’alia mós kona-bá karta destituisaun opozisaun hasoru Prezidente Parlamentu Nasionál.

Sekretáriu Estadu Konsellu Ministru no Komunikasaun Sosiál, Matias Boavida. Foto António Goncalves

“Ohin aprova ona rejimentu internu Konsellu Ministru nian rasik hodi hare funsionamentu bele la’o ho di’ak no bele hare lalauk oinsá Konsellu Ministru bele servisu di’ak liu tan,” Sekretáriu Estadu Konsellu Ministru no Komunikasaun Sosiál, Matias Boavida ba jornalista sira iha Palásiu Governu, Kuarta (6/12).

Diploma ne’e aprezenta husi Ministru iha Prezidénsia Konsellu Ministru, Adriano do Nascimento ne’e atu hadi’a Atuasaun KM nian iha matéria lejizlativa, tanba limitasaun testu kona-ba Rezolusaun Governu nian ne’ebé aprova iha tinan 2013.

Rejimentu KM ne’e, importante ba organizasaun no funsionamentu di’ak KM nian no atu ba aprovasaun lejizlasaun kompleta no kompriende-belek (komprensivel).

Alende ida ne’e, governante ne’e mós informa reuniaun KM ohin mós ko’alia kona-bá programa governu ne’ebé atu aprezenta ba Parlamentu Nasionál (PN) iha tempu badak.

“Dokumentu finaliza ona, hein de’it jurista sira hare di’ak liután atu labele iha falhansu sira ne’ebé ita iha hanesan deputadu balun ko’alia naun sistemátiku, naun koerénsia no seluk tan entaun ita halo di’ak liután antes atu haruka ba Parlamentu Nasionál,” Porta Voz governu ne’e esplika tan.

Nune’e mós nia dehan, ohin ko’alia mós kona-bá karta destituisaun ne’ebé mak Bloku Aliansa Maioria Parlamentár (BAMP) ne’ebé kompostu husi CNRT, PLP no KHUNTO hato’o ona ba Prezidente Parlamentu Nasionál (PPN), Aniceto Guterres.

“Parte governu halo análize daudaun razaun hitu ne’ebé sira aprezenta no iha prosedimentu ne’ebé la’o ona. Tanba afeta ba PPN nian, ita iha dalan ruma atu tuir mak prosedimentu legais ne’ebé iha no hein desizaun final husi pesoál ne’ebé afetadu,” Matias hakotu lia.

(Jornalista: Julia Chatarina)

(Editór : Manuel Pinto)

HUSIK IDA HATÁN