Klube Nasionál Husu Governu Hasa’e Orsamentu LFA

0
63
Soru-mutu entre estrutura LFA no estrutura Akadémika FC. Imajen Mídia LFA.

DILI (TATOLI)—Klube nasionál sira ne’ebé pasa ona ba Primera Divizaun Liga Futeból Amadora (LFA) époka 2018 hanesan Akadémika FC, DIT FC no Altélico Ultramar husu ba Governu liuhusi Sekretaria Estadu Desportu no Alta Kompetisaun atu hasa’e orsamentu ba Liga Futeból Amadora.

“Nu’udar klube ami sempre prontu apoia LFA atu bele organiza ita nia liga ne’e di’ak liu-tan ba oin maske ita sei hasoru difikuldade barak iha époka rua liu-ba. Tanba ne’e maka ami sei halo koordenasaun hamutuk ho klube sira seluk atu bele hatoo proposta liuhusi LFA ba Governu hodi bele aumenta tan osamentu ba LFA iha époka oin mai,” Prezidente Klube Akadémika FC, Gil Conceição, bainhira hala’o surumutu ho ekipa LFA iha sede Akadémika FC, UNTL, kuarta horsehik.

Soru-mutu entre estrutura LFA no estrutura DIT FC. Imajen Mídia LFA

Razaun aumenta osamentu, nia esplika, tanba LFA hatudu ona provas ba públiku katak aleinde bele dada setór seluk indireta involve iha atividade ida ne’e, LFA mós konsege loke kampu serbisu ba ema barak iha ne’ebé la’ós jogadór de’it maibé ba ofisiál nomós iha área seluk.

Iha sorin seluk, delegadu hosi ekipa DIT FC, Cosme Gama senti kontenti ho vizita LFA ne’ebé hakarak hala’o vizita ba sede klube hirak ne’ebé maka sei partisipa iha époka oin mai.

“Ida ne’e inisiativa ne’ebé di’ak ne’ebé maka ekipa LFA hala’o hodi bele hatene liu-tan kondisaun klube sira atu bele akomoda no tetu antes halo planu osamentu ba Governu aumenta,” nia dehan iha sorumutu ida ho estrutura LFA iha sede DIT FC.

Hasai foto hamutuk entre estrutura LFA no estrutura Akadémika FC hafoin soru-mutu. Imajen Mídia LFA.

Aleinde ne’e, Prezidente Atlético Ultramar, Ano Gusmão espera LFA bele kolabora hamutuk ho klube sira atu bele hetan patrosinadór ida ne’ebé bele fó ajuda hanesan ba klube sira.

“Nu’udar klube ami senti orgullu ho vizita ida ne’e liu-liu ideia furak hosi LFA ne’ebé hanoin ona atu hamutuk ho klube sira halo proposta ida ba patrosinadór ne’ebé maka hakarak ajuda ba klube 20 iha époka mai ne’e. Tanba sé ami klube ba mes-mesak mós ajuda ne’e mai depende ba ligasaun entre pesoál klube ho patrisinador. Maibé sé ba hamutuk ho LFA ha’u fiar ita sei hetan suporta ne’ebé boot liu-tan,ʺ nia afirma.

(Jornalista: Xisto Freitas)

(Editór : Manuel Pinto)

HUSIK IDA HATÁN