Joven Voluntarizmu Hakarak Banati Tradisaun Beiala Sira

0
82
Ilustrasaun

DILI, (TATOLI) – Prezidente Grupu Juventude Voluntáriu, Custodio S. da Costa, hateten inisiativa kria grupu joven voluntarizmu mak buka ajuda kbiit laek sira, faluk no oan ki’ak tuir kbiit hodi banati tuir tradisaun beiala sira nian iha tempu uluk bainhira ida hetan susar.

“Ho fuan ne’ebé sei nurak, maske seidauk iha paun iha liman, voluntarizmu iha preokupasaun atu responde buat ki’ik maske sukat ho ita-nia estadu forsa la hanesan, kbiit la hanesan maibé haree fila ba fuan no domin hakarak dedika-án tomak”, hatutan Custodio iha Ai-tarak laran, foin lalais ne’e.

Hatutan tan, tempu ohin nian, dalaruma iha bairu, aldeia ka suku, entre família eh maluk balun sei falta hahan no nesesidade sira seluk, maibé sira ne’ebé riku, haree hanesan la haree, rona hanesan la rona.

Tanba ne’e halibur joven voluntarizmu ne’ebé iha la haree ba suku, rasa, relijiaun no seluk tan hodi kria unidade no hala’o atividade voluntarizmu hodi tulun ema sira ne’ebé presiza.

“Ita koko hatudu ezemplu ba kolega seluk no ba komunidade karik balun ne’ebé nia hanoin seidauk to’o, seidauk nakloke, laran mós bele nakloke neneik ida ba ida, ba oin sei sai kultura ne’ebé di’ak liu”, akresenta.

Sujere ba foinsa’e katak ba oin nu’udar joven koko buka hamutuk haree difikuldade hodi fasilita. “Ita koko atu hamutuk haree difikuldade ne’ebé iha, nu’udar ema ne’ebé nunka hetan paun fuan ida iha liman maibé preokupa. Ida ne’e ita la’o nafatin”, fó hanoin.

Ezisténsia grupu ne’e hala’o ona atividade voluntáriu no sosiál lubuk hodi fó asisténsia ba komunidade nesesitadu sira tuir kbiit no kapasidade.

Realidade ida mak fim-de-semana ne’e sira ajuda halo konstrusaun ba vulnerável Domingas dos Santos iha Ai-tarak laran, aldeia Manufuik, Suku Kampung Baru, Dili.

Jornalista: Rafy Belo

Editora: Rita Almeida

HUSIK IDA HATÁN