Investidór Xina Sei Halo Plaza Daruak

0
195
Sentru Komersiál. Foto/Google.

DILI, (TATOLI) – Governu liuhosi Ministériu Komérsiu no Indústria (MKI) sei asina akordu ho Investidór internasionál ida husi Xina iha janeiru 2018, hodi harii plaza daruak ho investimentu bele to’o millaun 20.

Ministru Komérsiu no Indústria (MKI), António da Conceição, hatete hahú ona halo kontaktu ho investidór internasionál ida ne’e no sei harii segunda plaza iha zona Terra Santa nian.

“Plaza ne’e sei halo mós dezmobilizasaun ba vendedór sira ne’ebé mak agora daudaun fa’an hela iha Kampung Alor, sei dezmobiliza hotu husi ne’ebá, vendedór hotu telefone, buat sira eletrónika iha Kolmera nian hasai atu labele kria barullu tanba iha ne’ebá ne’e parte ida ne’ebé besik bá palásiu Governu no ita presiza organiza no ida ne’e sei hasai bá ne’ebá, Indonézia sira ne’ebé fa’an sasán iha Kolmera mós hasai bá hotu iha segunda plaza”, informa António iha Sentru Konvensaun Dili, ohin.

Ministru hatutan hahú janeiru sei halo inventarizasaun, identifikasaun ba vendedór hotu ne’e hira atubele halo aluguer ba fatin ida ne’ebé maka atu harii daudaun plaza ne’e.

“Terseira plaza atu halo iha Bekora, ida ne’e mós ha’u sei negosia hela. Sentru komersiál tolu ne’ebé mak importante atu hahú ona dezmobiliza, labele sentraliza de’it ema hotu iha kapitál hanesan ida Dili laran ne’e. Ita tenke hanoin Bekora iha sentru komersiál ida, Komoro tenke ida sentru komersiál ida, ida mak agora daudaun plaza”, hatutan.

Ministru ne’e afirma: “Ema investidór ha’u hasoru ona no nia hein de’it ona iha janeiru, ha’u mak tenke pro-ativu filafali atu indentifika ema sira (Indonézia) ne’ebé mak agora daudaun iha Aitarak-laran hira inklui merkadu Tais”.

Tanba ne’e tenke dezmobiliza no bá hotu fali plaza para depois fatin ne’e sai fali sentru turístiku atu lori turista kruzeiru sira bá lokál ne’e atu halo kompra.

“Sé ema ida de’it husik netik de’it dólar 100 iha ne’ebá ne’e ita bele dehan ona reseita ba nasaun ne’e komesa iha”.

Jornalista: Maria Auxiliadora

Editora: Rita Almeida

HUSIK IDA HATÁN