ME Husu Profesór Sira Kontinua Tuir Formasaun

0
104
Ministru Edukasaun no Kultura, Fernando Hanjam. Foto Tatoli/António Goncalves

DILI, (TATOLI) – Ministru Edukasaun no Kultura (MEK), Fernando Hanjam, apela ba profesór sira hotu iha Timor-Leste (TL) atu kontinua tuir formasaun, tanba ho polítika atu hadi’a kualidade ensinu aprendijazen.

“Aproveita tempu ne’e ho didi’ak, liu-liu relasaun ho avaliasaun dezempeñu dosente eh profesór, se mak la prienxe ona kritéria, nia sai husi profesór”, hatete ba profesór sira iha salaun INFORDEPE (Instituto Nacional de Formação de Docentes e Profissionais da Educação), Balide, kuarta (13/12), iha ámbitu semináriu intituladu FORMAR MAIS-Contributo Para a Formação Continua de Professores.

Governante ne’e fó hanoin ba profesór sira husi munisípiu 12, inklui RAAEO (Rejiaun Autonoma Administrativa Ambeno Oe-cusse) katak kualidade ensinu aprendijazen atu di’ak liu, importante tebes mak profesór sira hodi produz alunu sira ho kualidade.

Uluk tanba situasaun oi-oin, ema ho nível estudu ensinu báziku terseiru siklu (SMP-Sekolah Menengah Pertama) no ensinu sekundáriu (SMA-Sekolah Menengah Atas) bele sai profesór.

Tuir Hanjam, kestaun kualidade aprendizajen afeta mós ba oportunidade estudante bainhira remata ensinu superiór.

“Ne’e mak formasaun importante tebes hodi hadi’a ita-nia kualidade, ha’u-nia mensajen mak aproveita tempu ho didi’ak”, hato’o ministru ba profesór sira.

Entretantu profesora Maria Yasinta, husi ensinu sekundáriu 05 de Maio, Bekora, akresenta formasaun siénsia bázika importante nune’e bele reforsa sira hodi implementa ba alunu sira.

Tanba, bainhira iha ensinu báziku mak alunu sira-nia formasaun laduun di’ak sei fó impaktu ba sira bainhira ba ensinu superiór.

Entaun, ho formasaun ne’ebé simu, ho apoiu husi embaixada Portugal iha Timor-Leste, liuhusi Kooperasaun Portugeza no MEK bele prepara alunu sira kona-ba siénsia bázika.

“Espera katak ho formasaum ne’ebé ami simu sei fó objetivu ne’ebé pozitivu”, konklui.

Jornalista: Rafy Belo

Editora: Rita Almeida

HUSIK IDA HATÁN