Graduadu UNITAL Reprezenta Prioridade Nasaun

0
198

DILI (TATOLI)- Reitór Universidade Orientál Timor Lorosa’e (UNITAL), Roberto Seixas Miranda Jerónimo hateten perante graduadu na’in 641, família no autoridade timorense sira katak graduadu UNITAL reprezenta prioridade governu no nasaun nian.

“Graduadu sira ne’e reprezenta duni prioridade governu no nasaun nian ba satisfasaun sira ne’ebé prevista iha Planu Estratéjiku Dezenvolvimentu Nasionál, 2011-2030,” akresenta reitór Roberto Seixas iha Salaun Dom Bosco, Comoro-Díli, kinta (28/12) iha asembleia da-haat graduasaun no baxarlatu no lisensiadu UNITAL, 2017.

Iha graduasaun ho lema Com a Ciência e Sabedoria se Alcança Um Futuro Melhor ne’e, reitór UNITAL akresenta tan katak rikeza lolos kualker nasaun mak forsa husi nia povu sira. Maksimizasaun edukasaun no kualidade vida jerál sira povu Timor-Leste ne’e esensiál ba nasaun ida justa no dezenvolvida.

Iha liña ida ne’e UNITAL previlejia alkansa rezultadu ho aselerasaun ba dezenvolvimentu nasionál hanesan proklamadu iha UNITAL nia lema katak Harii, Hadi’a no Haburas.

“Ami forma ona lisensiadu sira iha área oi-oin hodi konklui ba dezenvolvimentu nasaun nian no ami  espera katak sei kontinua hanesan ba jerasaun sira tuir mai,’’ garante reitór universidade privada ne’e.

Ministru Edukasaun no Kultura, Fernando Hanjam hateten, ensinu superiór sira iha Timor-Leste sei hasoru dezafiu oi-oin liu-liu kona-ba kualidade no relevánsia hodi transfere koñesimentu.

Foto Espesial.

Tanba ne’e governante ne’e informa katak iha kongresu nasionál edukasaun datoluk promove tiha ona dialógu asertivu no transparente kona-ba jestaun ensinu superiór públiku no privadu ne’ebé identifika rekomendasaun lubuk hanesan; ida, elabora noa priva polítika ba jestaun no organizasaun ensinu superiór nian.

Rua, forma konsellu reitór sira atu hala’o dialógu no koordenasaun ba oferta akadémiku iha nível nasionál.

Tolu, garante ho efetivu hodi uza lian ofisiál rua (tetun no portugés) iha ensinu superiór no estuda atu hamosu ano zero hodi reforsa kompeténsia linguístika no koñesimentu sientífiku báziku.

Tuir mai, reforsa kolaborasaun ho parte instituisaun relijioza sira liu-liu iha parte igreja para nune’e reforsa kualidade ensinu no aprendijazen.

Ikus liu mak konsolida kna’ar ANAA (Agência Nacional para a Avaliação e Acreditação Académica) nian atu bele hala’o no forma ho efetiva, transparente no independete sira-nia kompeténsia kona-ba materiál avaliasaun no akreditasaun akadémiku.

Entretantu estudante graduadu UNITAL na’in 641 ne’e kompostu husi Fakuldade Direitu graduadu na’in 71, Fakuldade Siénsia Sosiál no Polítika graduadu 86, Fakuldade Ekonomia graduadu 113, Fakuldade Siénsia Téknika 184, Fakuldade Agrikultura na’in tolu, Fakuldade Edukasaun na’in 186 no Fakuldade Siénsia no Saúde na’in tolu.

Graduasaun ne’e realiza bazea ba despaxu MEK nian ne’ebé dispoen hodi UNITAL bele hala’o graduasaun mak despasu nú. 108/GM-MEC/XII/2017, akreditasaun inisiál liuhusi diploma ministeriál nú.03/GM-ME/I/2014.

Tan kumpri ona rekizitu determinadu dispostu iha artigu 7/nú. I, dekretu lei nú.35/2017, 21 novembru.

(Jornalista: rafy Belo)

(Editór : Manuel Pinto)

HUSIK IDA HATÁN