Governu Finaliza Ona Programa Hein Aprezenta

0
389
Reuniaun Konsellu Ministru Primeiru Ministru. Foto Mídia PM

DILI (TATOLI) – Governu liuhosi reuniaun Konsellu Ministru (KM), aprova ona programa governu hanaran Programa Anótadu ne’ebé aprezenta husi Ministru iha Prezidénsia KM, Adriano do Nascimento no Ministru Planeamentu no Finansa, Rui Gomes hodi aprezenta bá daruak iha Parlamentu Nasionál (PN).

“Reuniaun ohin, aprova ona programa governu ne’ebé ami hanaran programa anótadu tanba sei fó esplikasaun ba programa governu ne’e rasik ne’ebé hetan rejeisaun iha fulan hirak liuba”, tenik Sekretáriu Estadu Konsellu Ministru no Komunikasaun Sosiál (SEKMKS), Matias Boavida ba jornalista sira iha Palásiu Governu ohin, Tersa (20/12).

Bainhira akompaña debate Orsamentu Ratifikativu (OR) horisehik, Ministru Adriano hateten programa governu anótadu seidauk mai aprezenta iha PN tanba sei halibur dadus, baseline no seluk tuir ezijénsia deputadu sira.

Dadus no baseline tenke real ba progresu ezekusaun Planu Estratéjiku Dezenvolvimentu Nasionál (PEDN) no ezekusaun programa governu anterior. Agora hotu ona no governu prontu atu lori mai aprezenta.

Antes ne’e loron 19 Outubru iha PN liuhosi plenáriu, Bloku Aliansa Maioria Parlamentár (BAMP) aprezenta ba meza Mosaun Rejeisaun hodi rejeita programa VII governu votu afavór 35 kontra 30, ho ida ne’e programa governu rejeitadú iha momentu ne’ebá.

Biar nune’e, governanta sira ho tulun husi ekipa Unidade Planeamentu, Monitorizasaun no Avaliasaun, analiza ona aliterasaun ba programa governu VII governu, hodi ikus mai Programa ne’e orienta husi PEDN no Objetivu Dezenvolvimentu Sustentável (ODS), hodi apoia polítika diversifikasaun ekonómika atu proporsionál independénsia finanseira ba reseita petrolífera sira.

Vizaun inkluziva, defeza justisa no promosaun nian ba moris-di’ak, hakerek iha dokumentu ida ne’ebé rigór no detalladu, sei tulun Governu atu hatán ba preokupasaun ne’ebé maka foti husi deputadu sira durante apresiasaun dahuluk, iha fulan kotuk, iha Parlamentu Nasionál.

Entretantu bazeia ba informasaun, governu sei aprezenta programa VII governu ba daruak iha Janeiru tinan oin tanba agora daduduk PN hahú ona ferias.

(Jornalista Julia Chatarina)

(Editór : Manuel Pinto)

HUSIK IDA HATÁN