Formasaun Dalen Portugués Ba Jornalista Presiza Habelar Ba Munisípiu Hotu

0
105
Sekretáriu Estadu Konsellu Ministru no Komunikasaun Sosiál (SEK-KS), Matias Freita Boavida entrega sertifikadu ba formandu.

DILI (TATOLI) – Sekretáriu Estadu Konsellu Ministru no Komunikasaun Sosiál (SEK-KS), Matias Freita Boavida informa, formasaun lina portugués ba jornalista sira presiza habelar ba munisípiu 12 inklui Rejiaun Autonomu Enkalve Oe-Cusse Ambeno (RAEOA) atu labele iha de’it Dili.

“Formasaun ne’e tenke iha kontinuidade ba jornalista sira maibé la’os jornalista sira iha Dili de’it mak hetan oportunidade no presiza jornalista sira hosi munisípiu hotu liliu jornalista rádiu komunidade,” Matias Freita Boavida ba jornalista sira hafoin serimónia entrega sertifikadu ba formandu konsultóriu lian portugués ba jornalista sira iha Palásiu Governu, Tersa (12/12).

Tuir nia, formasaun dalen portugés ba jornalista sira importante tebes tanba lian portugués nu’udar dalen ofisiál inklui Tetun ne’ebé Timoroan sira hili.

“Formasaun ne’e di’ak ba jornalista tanba jornalista sei sai hanesan ibun no tilun hodi hatutan informasaun ba povu tomak liuhosi eskrita notísia ho dalen portugués ne’ebé koretu,” nia salienta.

Nia husu atu ba jornalista sira no na’in ba média sira bele koopera hamutuk ho instituisaun Camoes atu bele hametin kooperasaun di’ak.

Governu nia kna’ar mak bele hametin no habelar liu tan kooperasaun atu bele fasilita jornalista sira nia profisionalizmu hakerek notísia iha lian portugés. Hanesan responsavel ba komunikasaun sosiál louva mós jornál Independente, Timor-Post, Tempu Semanáriu no RTTL bele iha ona pájina ida hodi publika konteúdu informasaun ho eskrita portugés ne’ebé di’ak.

Iha fatin hanesan, Reprezentante Formandu nivel B1, Maria Auxiliadora dehan, formasaun ne’e importante tebes ba jornalista tanba ne’e nia orgullu tan sira bele konklui kursu no hetan ona sertifikadu.

“Sertifikadu ne’ebé ami hetan hanesan responsabilidade boot ida hanesan formandu tanba presiza halo prátika ko’alia no hakerek atu bele hasa’e koñesimentu dalen portugés ho di’ak,” Maria promete.

Entretantu Formadora, Claudia Taveira apresia ba jornalista sira nia esforsu hodi aprende lian portugés tanba iha ámbitu formasaun hamosu traballu barak maibé sira ho vontade aprende bele no ikus mai iha duni rezultadu ne’ebé di’ak nune’e iha formandu hamutuk na’in 31 mak hetan seritifikadu, hosi ema na’in 30, na’in 20 iha nivel báziku no 11 iha nivel B1.

Iha fatin hanesan Reprezentante Embaixadór Portugal iha Dili, Jhon Brito Camara agradese ba Sekretáriu Estadu Konsellu Ministru no Komunikasaun Sosiál, Matias Boavida ho nia ekipa tomak ne’ebé halo kolaborasaun di’ak hodi verifika disponibilidade ema hotu nian no rekursu posivel ne’ebé envia ho esforsu hodi asegura ba implementasaun projetu ne’e.

Nia hein  kontinuasaun hosi programa ne’e órgaun komunikasaun sosiál balun iha ona disponibilidade hodi fó espasu ba pájina portugés hanesan tendénsia pozitiva ne’ebé permite ba formasaun ne’ebé efetivu no oposta iha prátika.

(Jornalista : Zezito Silva)

(Editór : Manuel Pinto)

HUSIK IDA HATÁN