Estudante UNTL Na’in 40 Hetan Tan Bolsa

0
183
Bolseiru sira hasai hamutuk ho reitór no estrutura UNTL nomós reprezentante embaixada Portugal, adida kooperasaun, Daniela Perreira. Foto: Media Komunikasaun UNTL

DILI (TATOLI)-Timoroan hamutuk na’in 40 ne’ebé durante ne’e estuda iha universidade nasionál timor-lorosa’e bolsa estudu hosi institutu Camoes liuhosi programa bolsa interna.

Bolseiru na’in 40 ne’e, sira na’in haat Estudante Fakuldade Agrikultura, Fakuldade Siénsia Ezata na´in tolu, na’in haat Fakuldade Siénsia Sosiál, Fakuldade Ekonomia no Jestaun na´in haat, Fakuldade Edukasaun na´in 20, Fakuldade Filozofia na´in ida, Fakuldade Medisina na´in tolu no Fakuldade Direitu na´in ida.

Reitór Universidade Nasionál Timor-Lorosa’e, Francisco Miguel Martins relata, estudante na’in 40 ne’e selesionadu ba bolsa ne’e, tanba ne’e nu’udar privilejiadu ida basa sira eskollidu entre estudante hotu-hotu iha universidade.

“Ho motivu ida ne´e, imi tenke estuda tan, keta para agora. Se estuda ona oras rua nia laran durante loron ida, tanbasá la hahú ona estuda oras haat iha loron ida? Se estuda ona oras haat iha loron ida, tanbasá la estuda oras neen?,” Francisco Miguel Martins enkoraja bolseiru sira, iha Kampus Liceu, Kuarta (06/12).

Husu mós atu estudante sira ne’e tenke mantein no hadi´a tan dezempeñu akadémiku basa Relasaun pozitiva entre Timor-Leste no Portugal proporsiona baze ida forte no signifikativa ba timor nia kreximentu futuru.

Reitór mós aproveita oportunidade fó parabéns no husu mós ba inan-aman sira atu kontinua fó tempu ba oan sira hodi estuda maka’as tan sira estuda maka’as mak hetan ona oportunidade, liu-liu bolsa estudu ne’e.

“Bolsa ida ne´e la´ós bolsa koitadu nian maibé ba prestasaun akadémika. Entre estudante sira, sira hirak ne´e de´it mak bele hetan tanba husi selesaun ida rigoroza husi sira-nia prestasaun akadémika,” nia informa ba inan-aman sira.

“Inan-aman sira, agradese wa´in, obrigadu wa´in fó tempu barak liu ba oan sira atu aprende di´ak liu, kle´an liutan sira-nia koñesimentu iha área espesífika ida-idak ninian atu ba iha ita-nia prosesu dezenvolvimentu nasionál ba oin, tanba sira mak futuru.”

Reprezenta embaixada Portugal, adida kooperasaun, Daniela Perreira dehan katak ho atribuisaun bolsa interna ne’e, Portugal mós apoia hela formasaun ba joven kuadru iha área konsiderada prioritária ba dezenvolvimentu Timor-Leste hodi kontribui ba sustentabilidade ensinu lokál, iha universidade públika nomós rekumpensaun ba kuadru kualifikadu iha Timor.

Iha biban, adida Daniela Perreira mós fó votu susesu ba estudante sira nomós bolseiru na´in haat foun hanesan Novita Perreira, Duarte Amaral, António Silva no Simões Magno hodi susesu iha perkursu profisionál.

“Agradese mós ba UNTL ba nia envolvimentu empeñu ba prosesu atribuisaun bolsa estudu,” nia agradese.

Reprezentante bolseiru, Maria Auxiliadora Barreto hodi bolseiru no inan-aman hato’o agradesimentu ba jenerozidade, ba apoiu no solidariedade Instititu Camões hodi oferese oportunidade proveitosa, programa bolsa estudu interna, hodi estudu iha UNTL.

Agradese mós ba governu Portugal tanba ajuda ona ami liuhusi kolaborasaun ho Instititu Camões ho Timor-Leste. Agradese mós ba Ministériu Edukasaun hodi buka kooperasaun ho nasaun viziñu ba dezenvolvimentu rekursu umanu kualifikadu iha Timor-Leste.

“La haluha mós agradese ba reitór, pro-reitór, dekanu no espesiál ba dosente UNTL ba apoiu inkondisionál ba desperta ami hodi aproveita oportunidade ida ne´e,” nia agradese.

Bolseira husi Fakuldade Edukasaun, Arte no Umanidade ne’e mós konfesa katak esforsu ne’ebé hala’o ona husi entidade oi-oin ne’ebé mak envolve nomós serbisu no aprendizajen ne´ebé mak sira halo ona, tuir nia, só bele rentabilizadu hotu, se sira bele kontinua dezenvolve sira-nia kapasidade no kompeténsia.

“Tanba ne´e, ami espera katak sei iha tan oportunidade formasaun liu-liu liuhusi kursu mestradu iha UNTL atu nune´e bele kontribui liutan no di´ak liutan ba dezenvolvimentu nasaun,” nia fó hanoin.

Entretantu, UNTL asina ona akordu kooperasaun 60 ho governu Portugal, liu-liu universidade, politékniku, organizasaun inklui akordu oi-oin ho Institutu Camões IP.

Akordu sira ne´e nu´udar akordu parseria ba kapasitasaun estudante, pesoál dosente, administrativu ho objetivu jerál atu asegura koñesimentu ensinu superiór públiku no produsaun sientífiku hodi eleva kualidade tuir nesesidade koñesimentu espesializadu iha UNTL nomós Timor-Leste. Bolsa interna, nu´udar ezemplu ida husi ezemplu sira seluk.

Programa ida ne´e hahú iha 2014 ho objetivu hodi dezenvolve kapitál umanu Timor-Leste nu´udar parte esensiál ba dezenvolvimentu sustentável no autonomo iha ita-nia nasaun.

Atribuisaun bolsa estudu ba bolseiru UNTL entrega mós sertifikadu apresiasaun ba benefisiáriu sira no asiste direta husi vise-ministru edukasaun, José Neves Samalarua, pro-reitór asuntu kooperasaun nasionál no internasionál, Eduardo Aniceto Serrão, dosente inklui família bolseiru sira.

(Jornalista: Rafy Belo)

(Editór : Manuel Pinto)

HUSIK IDA HATÁN