Edukasaun no Saúde Pilár Importante

0
162
Herman de Araújo Magno, joven husi suku Lahane Orientál. Foto/Egas Cristovão.

DILI, (TATOLI) – Herman de Araújo Magno, joven husi suku Lahane Orientál, hatete baihira edukasaun no saúde sai pilár importante iha polítika Sekretáriu Estadu Juventude no Traballu (SEJT) maka tenke toma atensaun maka’as tanba joven timoroan sai vítima ba edukasaun ne’ebé laiha kualidade no iha setór saúde nian tanba tua ne’ebé fa’an baratu iha merkadu.

“Tanba edukasaun hanesan sasukat ida ba nasaun iha futuru no laiha buat seluk. Se ita ko’alia kona-ba rekursu umanu iha futuru komesa agora ita tau atensaun boot”, Herman hatete iha ámbitu diálogu ho SEJT iha Kaikoli, ohin.

Herman kestiona mós sobre hahán ne’ebé laiha kontrolu no hemun ne’ebé tama mai Timor-leste maka husu papél SEJT nia mós atu toma atensaun tanba SEJT ko’alia sobre juventude.

“Tua ka jogu ilegál sira laiha kontrolu, kulpa sé nian? Ba joven? Kuandu mosu problema joven mak sai hanesan autór prinsipál, ne’e sira duun-matak joven mak autór mas parte sira nunka tau matan”.

Bainhira mosu problema no líder sira hatete joven mak jerasaun foun maibé atensaun menus no tinan-tinan ema garadua barak, maibé rezultadu husi ne’e sukat ho liman de’it.

“Ha’u hakarak dehan to’o agora joven barak halo garaduasaun ona, maibé lahalo buat ida. Tanba ne’e husu haraik-aan ba Sekretáriu Estadu Juventude no Traballu tau pilár lima, maibé foka uluk iha edukasaun no saúde tanba joven ida atu hetan edukasaun di’ak presiza iha saúde ida ne’ebé di’ak mós, maibé presiza mós kontrolu ba buat sira ne’ebé fa’an arbiru no tama iha Timór”.

Hatán ba ida ne’e Sekretáriu Estadu Juventude no Traballu (SEJT), Nívio Leite Magalhães, hatete edukasaun sai preokupasaun ema hotu nian no konkorda katak iha fatin balun instituisaun edukasaun nian presiza hadi’a liga fali ba kualidade.

“Tanba ne’e mak Governu mós iha ona autoridade ida para bele halo akreditasaun ba instituisaun sira ne’e. SEJT mós halo ona koordenasaun ho eskola sira maibé ida ne’e liga liu ba formasaun karater nian”.

Kona-ba preokupsaun joven nian, SEJT anota atu hato’o ba Ministériu Edukasaun. Bainhira edukasaun mak lafó atensaun maka bá oin kualidade husi joven bele menus tanba ne’e presiza solusaun.

“Kona-ba tua, jogu ilegál, hahán liga ba saúde nian, iha instituisaun relevante ne’ebé sei toma konta ida ne’e mak komérsiu ba komérsiu nian no iha AIFAESA atu haree kaulidade hahán produtu sira ne’ebé tama iha ita-nia rai”.

Sobre tua no sigarru tama ona programa SEJT nian atu iha tinan oin halo sosializasaun ba joven sira atu nune’e bele hadook aan husi buat ne’ebé estraga saúde, tanba joven mak forsa boot ida país ida ne’e.

Jornalista: Maria Auxiliadora

Editora: Rita Almeida

HUSIK IDA HATÁN